ახალი ამბები

საგარეჯოში პარლამენტის შუალედური არჩევნები ოქტომბერში გაიმართება, არჩევნებმა თავდაცვის მინისტრის, თინათინ ხიდაშელის შემცვლელი უნდა გამოავლინოს. ახალგაზრდა  იურისტი თამარ ხიდაშელი საგარეჯოს მაჟორიტარი დეპუტატობის კანდიდატად პრემიერმა წარადგინა. 

ახმეტის მუნიციპალიტეტის სოფელ მაღრაანში მცხოვრებმა 25 წლის მევდლუდ გერლიანმა თავი ჩამოიხრჩო. შემთხვევა დღეს დილით 7 საათზე მოხდა. თვითმკვლელობის მიზეზი უცნობია.

თუშეთში სტიქიის გამო ჩარჩენილი ყველა ტურისტის გადმოყვანა ვერ ხერხდება. ახმეტის მუნიციპალიტეტის გამგებლის ბექა ბაიდაურის განცხადებით, მიზეზი ამინდის გაუარესებაა, რის გამოც თუშეთის მიმართულებით ფრენა ვერ ხორციელდება. ბაიდაურის ინფორმაციით, თუშეთიდან 600-ზე მეტი ადგილობრივი და უცხოელი ტურისტები ვერტმფრენით გადმოიყვანეს. 

რთველის საკოორდინაციო შტაბი წელს  თელავში,  სასტუმრო ,,ალაზნის ველში“ განთავსდება, ამასთან,  შტაბის წარმომადგენლობა  გურჯაანშიც გაიხსნება.

თუშეთიდან 375 ადამიანი ვერტმფრენით გადმოიყვანეს. სამაშველო ოპერაციაში ავიაციაც ჩაერთო. ვერტმფრენებმა ვიზიტორები თუშეთიდან ახმეტისა და თელავის მიმართულებით უკვე გადაიყვანეს.

თუშეთთან დამაკავშირებელი გზა, სავარაუდოდ, ოთხ დღეში გაიხსნება. კომპანია “თუშეთის გზის” დირექტორის, ომარ ლეკიშვილის განცხადებით, ამ დროისათვის გზის 51-ე კილომეტრია გაწმენდილი. 

ციფრული მაუწყებლობის სააგენტოს ინფორმაციით, 25 აგვისტოს, 10:00 საათზე, ანალოგური საეთერო სატელევიზიო გადამცემი სადგურები გაითიშება ცივის მთაზე, სიღნაღში, ყვარელში, ლაგოდეხში, დედოფლისწყაროში, გურჯაანსა და თელავში, აგრეთვე, ახმეტის, გურჯაანის, დედოფლისწყაროს, თელავის, ლაგოდეხის, საგარეჯოსა და სიღნაღის მუნიციპალიტეტების ტერიტორიაზე განთავსებული ხელშემშლელი ანალოგური სატელევიზიო გადამცემები.

კახეთში მეორე დღეა სტიქიისგან მიყენებულ ზარალს ითვლიან. მოსახლეობას, ვისაც ვენახები დაზღვეული არ ჰქონდა, სადაზღვევო კომპანიები ზარალს არ აუნაზღაურებენ. 

თელავის სახელმწიფო უნივერსიტეტს ახალი პრორექტორი ჰყავს. რექტორმა ირმა შიოშვილმა მოადგილედ ჰუმანიტარულ მეცნიერებათა ფაკულტეტის ასოცირებული პროფესორი ალექსანდრე მოსიაშვილი დანიშნა.

გარემოს ეროვნული სააგენტოს მონიტორინგისა და პროგნოზირების ცენტრის ჰიდრომეტეოროლოგიური სამსახურის ინფორმაციით, აღმოსავლეთ საქართველოში დღეს, დღის განმავლობაში იწვიმებს.