,,გლეხური ბაზრის“ დირექცია გურჯაანის გამგეობას სასამართლოს გადაწყვეტილების აღსრულებას სთხოვს
ბაზრის მფლობელები ამბობენ, რომ 49-წლიანი სარგებლობის უფლებით იჯარით გადმოცემული მიწის ნაკვეთის ნაწილს გამგეობა თვითნებურად ითვისებს, რაც, როგორც თავად ამბობენ, ბიზნესსაქმიანობის განხორციელებაში უშლით ხელს. გამგეობაში აცხადებენ, რომ მიწის 35 კვ. მეტრი ნაკვეთი მოიჯარეს უკვე ჩამოერთვა, რადგან იქ საფეხმავლო ბილიკი უნდა მოეწყოს და საზოგადოებრივი ტუალეტი აშენდეს.
ბაზრის მფლობელ ნუკრი ლიპარტაშვილის თქმით, გურჯაანის გამგეობასთან სასამართლო დავა წლებია, გრძელდება და უწყება სხვადასხვა მიმართულებით მათ შევიწროვებას ცდილობს. ლიპარტაშვილი აღნიშნავს, რომ იჯარით აღებული მიწის ფართობიდან გამგეობამ თვითნებურად მიწის ნაწილი ორჯერ ჩამოაჭრათ.
,,გლეხური ბაზრის’’ გადმოსწვრივ, ხევის განაპირა ზოლი 2005 წელს იჯარით ავიღეთ, იმიტომ, რომ შეგვენარჩუნებინა მწვანე ზოლი და არ მომხდარიყო განაშენიანება. 2011 წელს გამგეობამ ტერიტორიის ის ნაწილი ჩამოგვაჭრა, რომელიც საჯარო რეესტრში კი იყო დარეგისტრირებული, მაგრამ მისი ციფრული ვარიანტი არ არსებობდა და მხოლოდ ქაღალდზე გვქონდა.
უწყებამ ეს ჩვენგან დაუკითხავად გაასხვისა და იმ ადგილას ახლა შენობებია აშენებული. 2013 წელს აღმოვაჩინეთ, რომ გამგეობას კიდევ ჩამოუჭრია ჩვენი ნაკვეთისთვის 8-9 მეტრის სიგრძის ფართი და დაირეგისტრირა ცალკე, რადგან გასაყიდად იყო გამზადებული და მყიდველებიც ჰყავდათ უკვე მოძიებული.
ჩვენ გამგეობას მაშინვე მივმართეთ და მოვითხოვეთ აღნიშნული ფართის იჯარით დარეგისტრირება 2005 წლის ხელშეკრულების საფუძველზე. იქიდან მოვიდა პასუხი, რომ ეს ნაკვეთი იმ იჯარის ხელშეკრულებაში არ შედიოდა. ჩვენ ეს გადაწყვეტილება გავასაჩივრეთ და სასამართლომ გადაწყვიტა, რომ ეს ტერიტორია შედიოდა იჯარის ფართში და გამგეობას დაავალა საქმის განხილვა და დარეგისტრირება. გამგეობამ, ამის მიუხედავად, არ აღასრულა სასამართლოს გადაწყვეტილება და გადაწყვიტა, რომ აღნიშნული ფართი არის საზოგადოებრივი საჭიროება და უნდა ჩამოგვერთვას,’’– ამბობს ნუკრი ლიპარტაშვილი.
მისი თქმით, გამგეობას აღნიშნული ფართის კერძო პირების სასარგებლოდ გასხვისება აქვს გადაწყვეტილი. ლიპარტაშვილი მიიჩნევს, რომ, თუ მიწის ნაკვეთი საზოგადოებრივი საჭიროების მქონეა, უნდა არსებობდეს სათანადო დოკუმენტაცია, სადაც დეტალურად იქნება გადმოცემული, რატომ და რისთვის არის საჭირო მიწის ნაკვეთის ჩამორთმევა, რაც გამგეობას ამ დრომდე არ აქვს.
,,არსებობს კანონი, რომელიც დეტალურად განმარტავს რა არის საზოგადოებრივი საჭიროება, რომელი პროექტი, რა მიზნით და რა ფინანსებით უნდა განხორციელდეს, ვთქვათ, გზის გაყვანა. ამ შემთხვევაში გამგეობა ფეოდალიზმის ხანის წერილს წერს, მას დღეს აღარ სურს აღნიშნული ნაკვეთი შედიოდეს ჩვენს საიჯარე ფართში.
სიმართლე არის ის, რომ ვიღაც კერძო პირებს დაყენებული აქვთ საკითხი, რომ უნდა იყიდონ და გამგეობა ამის თქმასაც ვერ ბედავს. ამ წლების განმავლობაში იქ მდგარი ხეები ჩვენ გადავარჩინეთ. ეს ერთი მწვანე ზოლი იყო და ამასაც გვართმევენ. ამბობენ, რომ აღნიშნულ ტერიტორიაზე არსებული საცალფეხო ბილიკი იმიტომ არ რემონტდებოდა, რომ არ იყო მათი საკუთრება. თუ გამგეობას რამის გაკეთება უნდოდა ან უნდა, მას ხელს არავინ უშლის. ჩვენ მზად ვართ, ნებისმიერი კუთხით დავეხმაროთ, თუნდაც ტექნიკური,” – ამბობს ნუკრი ლიპარტაშვილი.
,,გლეხური ბაზრის’’ მფლობელის ბრალდებებს გურჯაანის მუნიციპალიტეტის გამგეობაში პასუხობენ. უწყებაში ამბობენ, რომ ხევის მიმდებარე სანაპირო ზოლი 2005 წელს უწყებამ კონკურსის წესით იჯარით გასცა, რომლის პირობაც ტერიტორიის პირვანდელი მდგომარეობის შენარჩუნება და მისი მოვლა-პატრონობა იყო, რაც მოიჯარემ არ შეასრულა.
გურჯაანის მუნიციპალიტეტის გამგეობის პრესასა და საზოგადოებასთან ურთიერთობის განყოფილების უფროს ზვიად ბიაშვილის თქმით, ბოლო ორი წლის მანძილზე ზედამხედველობის სამსახური აღნიშნული ადგილს ხშირად ათვალიერებდა და ტერიტორია მუდმივად იყო დაბინძურებული.
,,2005 წელს გურჯაანის მუნიციპალიტეტის გამგეობამ კონკურსის მეშვეობით იჯარით გასცა ბაზრის გადმოსწვრივ ხევის მიმდებარე სანაპირო ზოლი – 570 კვ.მეტრი მიწა. კონკურსის პირობა იყო მიწის პირვანდელი მდგომარეობის შენარჩუნება და მოვლაჶპატრონობა. 2015 წლის სექტემბერში ბაზრის ადმინისტრაცია ოფიციალურად გავაფრთხილეთ, რომ შეასრულოს ხელშეკრულების პირობები, წინააღმდეგ შემთხვევაში, შეუწყდებათ ხელშეკრულება. რაც შეეხება 58 კვ. მეტრ მიწის ნაკვეთს, საიდანაც 35 კვ. მეტრი მოიცავდა საიჯარო მიწის ფართს, ეს მიწა მუნიციპალიტეტს დასჭირდა საზოგადოებრივი საჭიროებისთვის. იგეგმება საფეხმავლო ხიდის მოწყობა და საზოგადოებრივი ტუალეტის მშენებლობა, ამიტომ 35 კვ. მეტრი მიწა ჩამოერთვა მოიჯარეს და, ამრიგად, შეუმცირდა საიჯარო ფართი, რომელიც 2015 წლის 15 სექტემბრის #1601 ბრძანებით გასაჩივრებული აქვთ,’’ – განაცხადეს გამგეობაში.
ლიპარტაშვილი აცხადებს, რომ აღნიშნული ფართის დასუფთავების საკითხი დიდი პრობლემაა. მისი თქმით, ბაზრის გარეთ მყოფი გარემოვაჭრეები ხევის გასწვრივ მდებარე ტერიტორიას ყოველდღიურად ანაგვიანებენ. ლიპარტაშვილი განმარტავს, რომ ისინი აღნიშნულ ფართს ეტაპობრივად ასუფთავებენ, თუმცა მისი ნაგვისგან გაწმენდა გამგეობას დაქვემდებარებული დასუფთავების სამსახურის მოვალეობაა.
,,ჩვენ არა მარტო გამგეობას, საპატრულოსაც მივმართეთ, რომ გარეთ მოვაჭრე ხალხის მიერ ნაგვის ქუჩაში დაყრის ფაქტების აღმოფხვრაზე ემუშავათ. ისინი ნაგავს პირდაპირ ქუჩაში და იქვე ხევში ყრიან. ჩვენ გამგეობას გარემოვაჭრეების ბაზრის შიგნით შემოყვანა შევთავაზეთ, მაგრამ თავისი საქმიანობით ამ ადამიანებს ხელსაც კი უწყობს. თვითმმართველობა ჩვენ გვიყენებს პრეტენზიას, რომ, რადგან იჯარა გაქვს, უნდა დავასუფთავოთ. რა თქმა უნდა, პერიოდულად ვასუფთავებთ, მაგრამ ყოველდღიურად ადამიანი, რომ ნაგავს ჰყრის, მე რატომ უნდა ვასუფთავო? თუ ნაგვიანდება და გამგეობის დასუფთავების სამსახური არ აკეთებს არაფერს, ჩემი პრობლემაა? იქ არც ნაგვის ურნაა და არც ინფრასტრუქტურა, ხალხი ამიტომ ნაგავს პირდაპირ დაბლა ჰყრის. გამგეობის პოზიცია ჩემთვის გაუგებარია. ის პრინციპულად დგას ჩვენს წინააღმდეგ და ხელს გვიშლის ბიზნესსაქმიანობაში,’’ – განაცხადა ნუკრი ლიპარტაშვილმა.
ბაზრის დირექციამ ადგილობრივ თვითმმართველობას სასამართლო გადაწყვეტილების აღსრულების მოთხოვნით უკვე მიმართა. ბაზრის დირექტორ ლამარა აკოფაშვილის თქმით, დღეს იკვეთება ბიზნესჯგუფთან გამგეობის მაღალი თანამდებობის პირების დაპირისპირება, რაც მათ მიერ საქმიანობაში ხელის შეშლაა.
,,მიუხედავად იმისა, რომ აქამდე გამართულ ყველა სასამართლო პროოცესში გამგეობა გამტყუნდა და გაუქმდა მათ მიერ ბიზნესჯგუფში შემავალი სუბიექტების საწინააღმდეგოდ მიღებული გადაწყვეტილება და პოზიცია, გამგეობა მაინც ცდილობს ახალი მიზეზებითა და შეცვლილი ფორმით საკითხის გადაწყვეტილების შეფერხებას, გაჭიანურებას ან დაბლოკვას. ეს ხელს გვიშლის ბიზნესსაქმიანობის განხორციელებაში. ჩვენ საკრებულოს თხოვნით მივმართეთ, რომ სასამართლო გადაწყვეტილება აღსრულდა. ჩვენი სურვილი არ არის და არც გვინდა სასამართლო განხილვების სტადიაზე დაბრუნება,’’ – განაცხადა ლამარა აკოფაშვილმა.