,,მინდა, რომ მეტი თელაველი იყოს დასაქმებული”
თელავის ვიცე-მერი თენგიზ მთვარელიშვილი გამოფენას დადებითად აფასებს და მიიჩნევს, რომ ღონისძიება კარგი საშუალებაა, გავეცნოთ, რა გვაქვს დღეს შრომის ბაზარზე.
იგი მიიჩნევს, რომ ბიზნესს გაცილებით მაღალი სტანდარტები და მოთხოვნები აქვს, ვიდრე ამას ბაზარზე არსებული კადრები სთავაზობენ. ვიცე-მერი ჩვენთან საუბარში აცხადებს, რომ დასაქმების თემა ქვეყნისთვის ერთ-ერთი მთავარი გამოწვევაა. იგი მიიჩნევს, რომ განათლებისა და დასაქმების გამოფენა პრობლემის დაძლევის მხრივ საჭირო აქტივობაა. ,,ბევრი, ვინც მუშაობს კონკრეტულ ხელობაზე, მაგალითად, მეთუნუქეს, მზარეულს, ვეტერინარს შეუძლია, თუ აქვს საკმარისი ცოდნა და გამოცდილება ამ კუთხით, გამოიმუშავოს მაღალი ანაზღაურება და ოჯახი ჰყავდეს ფინანსურად უზრუნველყოფილი. ეს აქტივობაც დაკავშირებულია იმასთან, რომ გარკვეულწილად, ერთი მხრივ, ბიზნესის მოთხოვნილებები გავიგოთ, მეორე მხრივ კი – შრომის ბაზარზე ადამიანური რესურსის შესახებ, რამდენად კონკურენტუნარიანია ადამიანების ცოდნა და გამოცდილება კონკრეტული პოზიციის კუთხით”.
მთვარელიშვილი მიიჩნევს, რომ პიროვნებას თუ გააჩნია კვალიფიკაცია და ფლობს გარკვეულ ცოდნასა და გამოცდილებას, მას დასაქმება არ გაუჭირდება. ,,ვისაც უმაღლეს სასწავლებელში სწავლა სურს, უნდა ისწავლოს, ეს მისი კონსტიტუციური უფლებაა, თუმცა მხოლოდ დიპლომის აღებით არ მთავრდება წარმატების მიღწევა. ამას სჯობს, პიროვნება დაეუფლოს გარკვეულ ხელობას რაც მას აინტერესებს. შრომა არავის შეურაცხოფს და არ არის სათაკილო, შრომა აძლევს ადამიანს საკუთარი თავის პოვნის საშუალებას. განსაკუთრებით ახალგაზრდებმა უნდა იფიქრონ, რომ მათ შეუძლიათ დასაქმება, თუ შეისწავლიან პროფესიებს, დაეუფლებიან ამა თუ იმ ხელობას, რომელიც დაეხმარებთ, თავი იგრძნონ რეალიზებულად ამ საზოგადოებაში”.
ვიცე-მერის მოსაზრებით, ბიზნესს სჭირდება კვალიფიციური კადრი. მიუხედავად იმისა რომ უმუშევარი ბევრია, კვალიფიცური კადრი მაინც არასაკმარისია. ,,ჩვენ უნდა შევქმნათ ისეთი გარემო, რომელიც წაახალისებს ადამიანებს, უნდა წარვადგინოთ წარმატებული ადამიანები, მაგალითად ჩემს მეგობარ მზარეულს აქვს ჩემზე ორჯერ მეტი ხელფასი, მან უნდა თქვას, რომ დიახ, მე ვარ მზარეული, ვარ წარმატებული, მაქვს მაღალი შემოსავალი ჩემი შრომით, ხელობით, მყავს ოჯახი უზრუნველყოფილი, ვისვენებ წელიწადში ორჯერ და რომ ხელობის სწავლა არ არის სირცხვილი. მაგალითისთვის გეტყვით, რომ ცოტა ხნის წინ ვიყავი შვეიცარიაში. ვნახე საკმაოდ ძვირადღირებული სასწავლებელი, სადაც სწავლობდნენ ინგლისელ ლორდთა, შეიხის შვილები. მათ სტატუსი აძლევთ საშუალებას, რომ იცხოვრონ უზრუნველად, მაგრამ ასე არ ხდება. იმ სასწავლებელში ეს ახალგაზრდები სწავლობენ მარკეტინგს, როგორ მოუარონ, დაასუფთავონ ოთახები, როგორ გახდნენ კარგი მზარეულები. ასე რომ, ყველა საქმე დაფასებულია და სათაკილო არ არის, როცა ადამიანი გულით აკეთებს”.
თენგიზ მთვარელიშვილის განცხადებით, პიროვნების წარმატების გასაღები მის ხელშია. ადამიანმა უნდა იცოდეს, როგორ შეიქმნას კარიერა. მისი თქმით, გამოფენის ორგანიზატორი დანიელ ბირკემაიერი, ამ ღონისძიების მეშვეობით, სწორედ ამის გადმოცემას ცდილობს. ,,თუ გარკვეული პროცენტით შემცირდება უმუშევრობა და ადამიანები იფიქრებენ სხვაგვარად, რომ მე ვარ უმაღლესდამთავრებული, მაგრამ გარკვეულ პროფესიას ვისწავლი, მივესალმები. მაგალითვისთვის გეტყვით, რომ სანთლით არის საძებარი კარგი ვეტერინარი და გარწმუნებთ, რომ კარგი სპეციალისტი დღეს გამოიმუშავებს საკმაოდ მაღალ ანაზღაურებას, იქნება ძალიან ამაყი და რეალიზებული საკუთარი საქმით. მოვლენების სწორად შეფასება უნდა შევძლოთ და ვისწავლოთ, რადგან შრომის ბაზარი არის ის, რაც გვაქვს დღეს. ყველა ვერ იქნება იურისტი, ფინანსიტი, ბუღალტერი. არის ბევრი პროფესია, რომლებიც ძალიან მოთხოვნადია, მაგრამ არ არის კვალიფიციური კადრი. თუ ადამიანები სხვანაირად შეხედავენ და დაიწყენებ ფიქრს, გაცილებით ნაკლები გვეყოლება დაუსაქმებელი, განსაკუთრებით კი, ახალგაზრდები. ბატონი დანიელი აკეთებს ზუსტად ამას. იგი ცდილობს, რომ გარკვეულ კორელაციაში მოიყვანოს ეს ორი უკიდურესობა – ერთი მხრივ, რა მოთხოვნები აქვს ბიზნესს, მეორე მხრივ – რა უნდა ისწავლონ ადამიანებმა, რომ უპასუხონ ამ მოთხოვნებს. ხელისუფლებამ უნდა უზრუნველყოს ბიზნესგარემო, ჩვენ ვერ ვქმნით სამუშაო ადგილებს. ბიზნესგარემო უნდა იყოს კონკურენტული, სამართლიანი, ჯანსაღი, ნაკლები კლასიკური ბიუროკრატიით, რომ არ შეფერხდეს. განსაკუთრებულად სწრაფი ტემპით უნდა განვვითარდეთ. ძალიან დადებითად ვაფასებ ამ ღონისძიებას, მინდა, რომ ნაკლები თელაველი ვნახო დაუსაქმებელი, მინდა ყველა იღიმოდეს”.
განათლებისა და დასაქმების გამოფენა – „მომავალი შენია 2016“ გაიმართება 26 თებერვალს ვაჟა-ფშაველას სახელობის სახელმწიფო თეატრში.
ბიბერახი – თელავის პარტნიორობის კომიტეტი ახორციელებს მასშტაბურ საგანმანათლებლო პროგრამას. პროექტის ფინანსურ მხარდაჭერას უზრუნველყოფს GIZ გერმანიის ტექნიკური თანამშრომლობის ფონდი, ,,კავკასიის ქალაქთა ქსელის მცირებიუჯეტიანი პროექტების ფარგლებში გერმანიის განვითარებისა და თანამშრომლობის სამინისტრო.
მხარდამჭერები: მეცნიერების და განათლების სამინისტრო, სპორტისა და ახალგაზრდობის სამინისტრო , შრომის, ჯანმრთელობის და სოციალური დაცვის სამინისტრო. სკოლები, რესურს ცენტრები, უნივერსიტეტი და პროფესიული კოლეჯები, არასამთავრობო სექტორი, სამთავრობო წარმომადგენლობა (გუბერნია და თელავის, ახმეტის, გურჯაანისა და ყვარლის მუნიციპალიტეტები და საკრებულოები) და რეგიონის ბიზნესის ფართო სპექტრი. თელავი გამოფენის მასპინძელია. პროექტები 2004 წლიდან დაიწყო: თელავის რუკა, პირველი მუსიკალური სკოლის აღდგენა, საბაკალავრო სასწავლო პროგრამა – პროექტის მენეჯმენტი (სამშენებლო და მცირე ბიზნესის მენეჯმენტი), საყოფაცხოვრებო ნარჩენები/დასუფთავება და პროფესიული საგანმანათლებლო პროგრამის გაუმჯობესება.
