ვინ არის წარმატებული თელაველი ელექტროტექნიკოსი
მაშინ, როდესაც ელექტროტექნიკოსი დეფიციტურ პროფესიად ითვლება, არსებობს ახალგაზრდა ელექტროტექნიკოსი, რომელიც წლებია თავისი პროფესიით წარმატებით მუშაობს, ეს თელაველი გიორგი ტეტებოშვილია.
იგი თელავის იუსტიციის სახლში მუშაობს. გიორგი ტეტებოშვილი საკუთარი წარმატების ფორმულად საქმისადმი სიყვარულს ასახელებს. პროფესია ელექტროტექნიკოსმა მამამ შეაყვარა. ,,2007 წელს დავამთავრე საქართველოს ტექნიკური უნივერსიტეტი საინჟინრო მეცნიერებათა ფაკულტეტი ენერგეტიკის განხრით. მამა იყო ენერგეტიკოსი და ბავშვობიდანვე ვეცნობოდი. ჩემი პროფესია ძალიან დეფიციტურია, ასევე, რთული და შრომატევადი. მამამ მირჩია, რომ ამ ფაკულტეტზე ჩამებარებინა, მეც მინდოდა, ჩვენი მოსაზრებები ერთმანეთს დაემთხვა და შევისწავლე ეს პროფესია”.
გიორგის ერთი ჩვეულებრივი დღე დილის 9 საათზე იწყება. გარდა იმისა, რომ მას სტაბილური სამსახური აქვს, როგორც პროფესიონალი, კერძო კომპანიებსაც უწევს ერთჯერად მომსახურებას. ,,ამჟამად ვმუშაობ თელავის იუსტიციის სახლში ენერგეტიკოსად. კიდევ კერძო ორგანიზაციებს ვუწევ ერთჯერად მომსახურებას, როცა უზიანდებათ ან ახლის მონტაჟი ხდება. დილა იწყება 9 საათზე და მეწყება სამუშაო პროცესი. თუ კერძო რამე საქმე არ მაქვს, იუსტიციის სახლში ვარ და დაზიანებულ სანათებს ვცვლი, ასევე, ვამოწმებ ელექტროფარებს, რათა გამართულად იმუშაოს პრობლემის გარეშე. როცა დაზიანება არ არის, 6 საათზე ვთავისუფლდები სამსახურიდან. თუ რთული ან დიდი ხნის სამუშაოა, შეიძლება, დილით ძალიან ადრე ავდგე და საღამოს გვიან დავასრულო ჩემი სამუშაო დღე“.
ჩვენი რესპონდენტი ჩვენთან საუბარში აცხადებს, რომ საქმეს, რომელსაც იგი ემსახურება დიდი სიყვარულითა და ხალისით აკეთებს. ,,ენერგეტიკა ბევრ სფეროს შეიცავს. რთულია, ვინმემ ყველაფერი კარგად იცოდეს. მე ავირჩიე ექსპლუატაცია (10/04 კვ. ეგხ და სატრანსფორმატორო პუნქტების მონტაჟი-დემონტაჟი) და შევისწავლე ბოლომდე კარგად. ჩემთვის ეს უფრო ახლო იყო და მოთხოვნადი არის და იქნება. ენერგეტიკა დიდ შრომას მოითხოვს, როგორც თეორიულ, ასევე, პრაქტიკულ ცოდნას”.
გიორგისვე განცხადებით, მისი პროფესია გარდა იმისა, რომ საკმაოდ შრომატევადია, დიდ პასუხისმგებლობას მოითხოვს. ,,ჩემი პასუხიმგებლობაა სამუშაოს, საქმის უსაფრთხოდ შესრულება”.
გიორგი ახალგაზრდებს ურჩევს, რომ შეისწავლონ, დაეუფლონ დეფიციტურ პროფესიებს, რომლებიც შრომის ბაზარზე საკმაოდ მოთხოვნადია და მიწოდება კი, შედარებით ნაკლები. ,,ახალგაზრდებს პირველ რიგში, ექნებათ ხელობა და პროფესია, რომელიც ყოველთვის მოთხოვნადია, მაგალითად, ელექტროენერგია ყველა საწარმოში თუ საცხოვრებელ სახლში გვაქვს, ყოველთვის არის საქმე, შესაბამისად, ხარ დასაქმებული. ამ სფეროს სპეციალისტები შრომის ბაზარზე საკმაოდ მოთხოვნადია, მაგრამ ახალგაზრდობას არ სურს. ზოგს ეშინია და, ალბათ, მშობლებიც ეუბნებიან, რომ საშიშია, ეს მიზეზიც შეიძლება ვივარაუდოთ. ნაკლებად მგონია, რომ ეს დაკავშირებული იყო ანაზღაურების საკითხებთან, შიშია მიზეზი.”
ბიბერახი – თელავის პარტნიორობის კომიტეტი ახორციელებს მასშტაბურ საგანმანათლებლო პროგრამას. პროექტის ფინანსურ მხარდაჭერას უზრუნველყოფს GIZ გერმანიის ტექნიკური თანამშრომლობის ფონდი, ,,კავკასიის ქალაქთა ქსელის მცირებიუჯეტიანი პროექტების ფარგლებში გერმანიის განვითარებისა და თანამშრომლობის სამინისტრო.
მხარდამჭერები: მეცნიერების და განათლების სამინისტრო, სპორტისა და ახალგაზრდობის სამინისტრო , შრომის, ჯანმრთელობის და სოციალური დაცვის სამინისტრო. სკოლები, რესურს ცენტრები, უნივერსიტეტი და პროფესიული კოლეჯები, არასამთავრობო სექტორი, სამთავრობო წარმომადგენლობა (გუბერნია და თელავის, ახმეტის, გურჯაანისა და ყვარლის მუნიციპალიტეტები და საკრებულოები) და რეგიონის ბიზნესის ფართო სპექტრი. თელავი გამოფენის მასპინძელია. პროექტები 2004 წლიდან დაიწყო: თელავის რუკა, პირველი მუსიკალური სკოლის აღდგენა, საბაკალავრო სასწავლო პროგრამა – პროექტის მენეჯმენტი (სამშენებლო და მცირე ბიზნესის მენეჯმენტი), საყოფაცხოვრებო ნარჩენები/დასუფთავება და პროფესიული საგანმანათლებლო პროგრამის გაუმჯობესება.
