ახალგაზრდები პროფესიების შესახებ – გამოკითხვა
რომელ სპეციალობებს მიიჩნევენ პრიორიტეტულად და დეფიციტურად თელაველი ახალგაზრდები, რომელს და რატომ ირჩევენ, ამას ჩვენი გამოკითხვიდან შეიტყობთ.
ეთი შოშიაშვილი, 24 წლის:
დღეს კვალიფიციური კადრები ძალიან ჭირს, განსაკუთრებით რეგიონებში. ქალაქებიდან ახალგაზრდები გარბიან თბილისში განათლების მისაღებად, ასევე, სამსახურის საძებნელად. აბიტურინტები ძირითადად აბარებენ იურიდიულზე, სამედიცინოზე, საერთაშორისო ურთიერთობებზე, სწავლობენ ბუღალტერიას. შემდეგ აიღებენ დიპლომს და თავს პროფესიონალებად მიიჩნევენ, წუწუნებენ სამუშაო ადგილების არარსებობაზე. ჭირს კარგი სანტექნიკის შოვნა, ფაქტობრივად არ მოიძებნება ვეტექიმი, კარგი დურგალი და ა.შ. ეს იმიტომ ხდება, რომ ნახევარი საქართველო ექიმი და იურისტია. კვალიფიციური კადრების მისაღებად საჭიროა ხელობაზე ორიენტირებული სასწავლებლების არსებობა, სადაც სწორედ იმ პროფესიებს შეისწავლიან, რაც გამოყენებადი და შემოსავლიანია. აუცილებელი არ არის ყველა უმაღლეს სასწავლებელში სწავლობდეს, შემდეგ დიპლომი კარადის თავზე შემოდოს. ამას სჯობს იყო კარგი პარიკმახერი, რადგან შემოსავლის თვალსაზრისით ეს უფრო მომგებიანია.
ვახო ვარდიაშვილი, თესაუს სოციალურ მეცნიერებათა ბიზნესისა და სამართლის ფაკულტეტის საჯარო მმართველობის მესამე კურსის სტუდენტი:
კახეთში და, ზოგადად, საქართველოში აბიტურიენტების უმრავლესობას, რომ ვკითხოთ, თუ რომელი პროფესიის დაუფლება სურთ, გვეტყვიან სამართლის ან ბიზნესის ადმინისტრირების. დღესდღეობით, როგორც კახეთის რეგიონში, ასევე, საქართველოში მრავლად გვხვდებიან იურისტები, ბიზნესმენები და სხვა, დასაქმების მხრივაც რთულია და დასაქმების ბაზარზე ამდენი იურისტი ნამდვილად საჭირო არ არის. ჩემი აზრით, მოთხოვნადი და ამავდროულად დეფიციტური პროფესიებია: აგრონომი, უცხო ენის სპეციალისტი (თარჯიმანი), ინჟინერ-მშენებელი (გზების, ხიდების, შენობების), ეკონომისტი.
კახეთში, სოფლის მეურნეობისა და ღვინის სამშობლოში, ძნელად თუ მოიძებნებიან კარგი აგრონომები, სოფლის მეურნეობის მენეჯერები, მეღვინეები, ასევე, კახეთში ძნელად მოიძებნება კარგი ეკონომისტი, ფსიქოლოგი, საფინანსო და მარკეტინგის მენეჯერი.
თელავის სახელმწიფო უნივერსიტეტში აგრონომიისა და სოფლის მეურნეობის კუთხით ისწავლება რამდენიმე საგანმანათლებლო პროგრამა: აგრონომია, სასურსათო ტექნოლოგიები და სხვა. თელავის სახელმწიფო უნივერსიტეტში სასურსათო ტექნოლოგიები პრიორიტეტულად არის მიჩნეული განათლებისა და მეცნიერების სამინისტროს მიერ და იგი სრულად ფინანსდება სახელმწიფოს მიერ ამ პროფესიაზე სწავლა, მსგავსი წახალისებები აბიტურიენტებისათვის აუცილებელია, რადგან კახეთში მოთხოვნადი პროფესიაა და დასაქმების მხრივაც ადვილად არის შესაძლებელი, რომ დასაქმდე, ასევე, უნივერსიტეტმა უნდა მისცეს შესაბამისი ცოდნა. თელავის უნივერსიტეტში არ არის ეკონომიკის ფაკულტეტი და ეს სამწუხაროა, რადგან ამ მხრივაც დეფიციტია რეგიონში და კარგი იქნება, თუ თელავის სახელმწიფო უნივერსიტეტში იქნება ეკონომიკის სპეციალობაზე სწავლა შესაძლებელი.
თათია აივაზაშვილი, მეთორმეტე კლასის მოსწავლე:
მინდა, რომ გავხდე უცხო ენების სპეციალისტი, მომწონს პედაგოგიური საქმიანობა და მიმაჩნია, რომ, რაც გიყვარს, ის საქმე უნდა აკეთო და არა ისწავლო იმისთვის, რომ მხოლოდ დიპლომი აიღო. ჩემთვის ეს ფაკულტეტი პრიორიტეტულია. რაც შეეხება დეფიციტურ პროფესიებს, კახეთი ვაზის სამშობლოა და ვფიქრობ, რომ სოფლის მეურნეობაში დასაქმებული კადრების კვალიფიკაციის სიმწირეა. მხოლოდ უნივერსიტეტის დამთავრებით ადამიანი ვერ გახდება საქმის პროფესიონალი, საჭიროა გადამზადება, ტრენინგების გავლა, გამოცდილების მიღება, რომ გახდე მოთხოვნადი შრომით ბაზარზე.
ლიკა ყარაულაშვილი, 23 წლის:
ჩემი აზრით, კახეთში დეფიციტურია სოფლის მეურნეობის დარგის სპეციალისტები. ამ პროფესიების შესწავლით ახალგაზრდებს, გარდა იმისა, რომ შეიძენენ ცოდნასა და დასაქმდებიან, ექნებათ სტაბილური შემოსავალი და არავისზე იქნებიან დამოკიდებულები. პრიორიტეტულია ის პროფესია, რომელსაც გამოიყენებ და შენი თავის რეალიზებას შეძლებ სასწავლებლის დასრულების შემდეგ.
ბიბერახი – თელავის პარტნიორობის კომიტეტი ახორციელებს მასშტაბურ საგანმანათლებლო პროგრამას. პროექტის ფინანსურ მხარდაჭერას უზრუნველყოფს GIZ გერმანიის ტექნიკური თანამშრომლობის ფონდი, ,,კავკასიის ქალაქთა ქსელის მცირებიუჯეტიანი პროექტების ფარგლებში გერმანიის განვითარებისა და თანამშრომლობის სამინისტრო.
მხარდამჭერები: მეცნიერების და განათლების სამინისტრო, სპორტისა და ახალგაზრდობის სამინისტრო , შრომის, ჯანმრთელობის და სოციალური დაცვის სამინისტრო. სკოლები, რესურს ცენტრები, უნივერსიტეტი და პროფესიული კოლეჯები, არასამთავრობო სექტორი, სამთავრობო წარმომადგენლობა (გუბერნია და თელავის, ახმეტის, გურჯაანისა და ყვარლის მუნიციპალიტეტები და საკრებულოები) და რეგიონის ბიზნესის ფართო სპექტრი. თელავი გამოფენის მასპინძელია. პროექტები 2004 წლიდან დაიწყო: თელავის რუკა, პირველი მუსიკალური სკოლის აღდგენა, საბაკალავრო სასწავლო პროგრამა – პროექტის მენეჯმენტი (სამშენებლო და მცირე ბიზნესის მენეჯმენტი), საყოფაცხოვრებო ნარჩენები/დასუფთავება და პროფესიული საგანმანათლებლო პროგრამის გაუმჯობესება.
