სოფელ ვაზისუბნის ნაწილი ბუნებრივი აირის გარეშეა დარჩენილი

სოფელ ვაზისუბნის მოსახლეობის უმრავლესობა ბუნებრივი აირის შეყვანას ვერ ახერხებს. ადგილო­ბრივები განმარტავენ, რომ „სოკარ პეტროლიუმ ჯორჯიამ“ მოსახლეო­ბას ცენტრალური მაგისტრალიდან სახლამდე ბუნებრივი აირის შეყვანი­სათვის, მრიცხველის საბაზრო ფას­თან შედარებით, გაცილებით ბევრი თანხა მოსთხოვა.
ვაზისუბნელ ნათელა ახალმო­სულიშვილს ზამთრის გატარება ბუნებრივი აირის გარეშე მოუწევს. მიუხედავად იმისა, რომ ცენტრალუ­რი მაგისტრალიდან სახლამდე ბუნე­ბრივი აირის მიყვანის სამუშაოების ღირებულება 600-დან 400 ლარამდე შემცირდა, ნათელა ახალმოსულიშ­ვილისთვის ეს ტარიფიც ძალიან ძვირია. ვაზისუბნელი ქალბატონი ბუნებრივი აირის შეყვანის ღირებუ­ლებას ვერც 16 თვის განმავლობაში 25-ლარიანი განვადებით ვერ გა­დაიხდის, რადგან მისი ერთადერთი შემოსავალი პენსია და სოციალური დახმარებაა:
„მხოლოდ პენსიისა და ამ დახმარების ანაბარა ვარ. მე მოსავლის მოყვანა არ შემიძლია, ავად ვარ, უა­მრავი ფული მეხარჯება წამლებში. 200 ლარი წამლებში, პურის ფულში და დენის გადასახადის გადახდაში არ მყოფნის და როგორ გამოვიყვან გაზს“, – ამბობს ვაზისუბნელი ნათე­ლა ახალმოსულიშვილი.
ნათელა ახალმოსულიშვილი აპროტესტებს იმასაც, რომ სოცია­ლურად დაუცველიც და შეძლებული მოსახლეობაც ბუნებრივი აირის შეყვანის ერთნაირი ტარიფით სარ­გებლობს:
„მე ვუთხარი უფროსს, თუ გაზის შეყვანის ფასი 400 ლა­რამდე ჩამოვიდა, გაჭირვებულმა და ფუფუნებაში მცხოვრებმა ხალხმაც ერთნაირად რად უნდა გადავიხადოთ-მეთქი. დავინტერესდი, სოციალურად დაუცველს შეღავათი რატომ არ მაქვს, დირექტორმა მითხრა, რომ ჩემთვის ვერაფერი გამიკეთებიაო, რადგან ეს ასეა დადგენილიო. ხუთი ლარი მიანც ჩამომაკლონ და 20 გადამახდევინონ“, – აღნიშნავს ნათელა ახალმოსუ­ლიშვილი.
გურჯაანის მუნიციპალიტეტის გამგებელი გია გერგიძე ადასტურებს, რომ, მძიმე სოციალური პირობე­ბიდან გამომდინარე, მოსახლეობას ბუნებრივი აირის ქსელში ჩართვის რეალური პრობლემა ექმნება. გერ­გიძე აღნიშნავს, რომ მთავრობასა და საქართველოს ენერგეტიკის მა­რეგულირებელ ეროვნულ კომისიას (სემეკი) შორის მოლაპარაკება მიმ­დინარეობს ტარიფის კიდევ უფრო დაწევის შესახებ.