საქართველოს საგარეო ვალი $8.6 მილიარდია
საქართველოს საგარეო ვალის სტატისტიკა ფინანსთა სამინისტრომ გამოაქვეყნა, რომლის მიხედვითაც ვალის მთლიანი მოცულობა გასულ წელს $319 მილიონი დოლარით შემცირდა და მან $8.6 მილიარდი შეადგინა.
საქართველოს საგარეო ვალის 59% ევროში არის ნომინირებული, ხოლო 2024 წელს ევრო დოლართან მიმართებით 5.6%-ით გაუფასურდა. ეს გაუფასურება საქართველოს საგარეო ვალზეც აისახა და დოლარში მისი მნიშვნელობა შეამცირა. დოლარში ვალის ნაშთის კლების მიუხედავად, გაზრდილია მისი ღირებულება ლარებში, რაც თავის მხრივ ლარის გაუფასურებას უკავშირდება. 2024 წელს ლარი 4.5%-ით გაუფასურდა, რის გამოც ვალის ნაშთი 150 მილიონი ლარით, 24.1 მილიარდ ლარამდე გაიზარდა.
ვალი უმეტესწილად საერთაშორისო საფინანსო ინსტიტუტების მიმართ არსებული ვალებისგან შედგება. მათ შორის პირველ ადგილზეა აზიის განვითარების ბანკი, რომლის მიმართაც ვალი 2.3 მილიარდ დოლარს შეადგენს. მეორე ადგილზეა მსოფლიო ბანკი, რომლის მიმართაც ვალის ნაშთი 2.1 მილიარდი დოლარია.
2024 წლის 31 დეკემბრის მდგომარეობით საქართველოს საგარეო ვალის ნაშთი:
| კრედიტორი | ვალის ნაშთი, მლნ დოლარი |
| აზიის განვითარების ბანკი (ADB) | 2,270 |
| მსოფლიო ბანკი | 2,113 |
| ევროპის საინვესტიციო ბანკი (EIB) | 1,079 |
| საფრანგეთი (AFD) | 766 |
| გერმანია (KFW) | 558 |
| საქართველოს ევრობონდი | 500 |
| IMF-ის მიმართ ეროვნული ბანკის ვალი | 351 |
| ევროპის რეკონსტრუქციისა და განვითარების ბანკი (EBRD) | 214 |
| აზიის ინფრასტრუქტურის საინვესტიციო ბანკი (AIIB) | 212 |
| IMF-ის მიმართ მთავრობის ვალი | 176 |
| ევროკავშირი (EU) | 139 |
| იაპონია | 118 |
| სოფლის მეურნეობის განვითარების საერთაშორისო ფონდი (IFAD) | 35 |
| ევროსაბჭოს განვითარების ბანკი (CEB) | 15 |
| ავსტრია | 10 |
| ქუვეითი | 9 |
| რუსეთი | 8 |
| ამერიკის შეერთებული შტატები | 6 |
| სკანდინავიური გარემოს დაცვის საფინანსო კორპორაცია (NEFCO) | 3 |
| თურქეთი | 2 |
| ყაზახეთი | 1.3 |
| აზერბაიჯანი | 1.2 |
| სომხეთი | 1.0 |
| ირანი | 0.8 |
| თურქმენეთი | 0.2 |