„ხელახლა მოხდება ავტომობილის ინსპექტირება“- როგორ შემოწმდებიან ცენტრები დარღვევებზე

პერიოდული ტექნიკური ინსპექტირების ცენტრის მიერ ავტოსატრანსპორტო საშუალებების შემოწმებისას, ტექნიკური რეგლამენტის დარღვევაზე ჯარიმები წესდება.

პარლამენტში წარდგენილი პროექტის მიხედვით, თუ ავტოსატრანსპორტო საშუალებებისა და მათი მისაბმელების შემოწმებისას პერიოდული ტექნიკური ინსპექტირების ცენტრმა ხარვეზები არ დააფიქსირა, სახიფათო დარღვევის შემთხვევაში – 5000 ლარის ოდენობით დაჯარიმდება, მნიშვნელოვანი – 2000 ლარით, უმნიშვნელო – 500 ლარით.

ამასთან, ტექინსპექტირების ცენტრების მონიტორინგი სახმელეთო ტრანსპორტის სააგენტოს დაევალება.

კონკრეტულად როგორ მოხდება ცენტრების შემოწმება – ამის შესახებ „ბიზნესპრესნიუსი“ ტექინსპექტირების ცენტრების კავშირის თავმჯდომარეს გიორგი შიოლაშვილს ესაუბრა.

მისი თქმით, ცენტრები სისტემატური ვიდეო მონიტორინგის ქვეშ იქნებიან, გარდა ამისა, სპეციალური ჯგუფები, ტექინსპექტირების ცენტრების მიერ შემოწმებულ ავტომობილებს მეორედ გადაამოწმებენ, ხარვეზის დაუფიქსირებლობის შემთხვევაში კი, შესაბამის ჯარიმებს გამოწერენ.

„ტექნიკურ რეგლამენტში გაწერილია სხვადასხვა სახის ხარვეზი, რომელიც შეიძლება დაუფიქსირდეს ავტომობილის მფლობელს, პერიოდული ტექნიკური ინსპექტირების პროცესში. ხარვეზის შინაარსიდან გამომდინარე, შესაძლებელია ეს ხარვეზი იყოს სახიფათო, მნიშვნელოვანი ან უმნიშვნელო.

მე ვფიქრობ, ასეთ მიდგომა უზრუნველყოფს უფრო მაღალი სტანდარტის დაწესებას ტექინსპექტირების ცენტრებისთვის. მათ მოუწევთ მეტად გაამკაცრონ შიდა მონიტორინგის სისტემა, რადგან საკმაოდ მაღალი ჯარიმებია და დიდი ფინანსური ტვირთი იქნება მათთვის. შესაბამისად, უფრო მობილიზებული იქნებიან“,- ამბობს გიორგი შიოლაშვილი.