კომპანია „Green Waves“ საგარეჯოში, 210 ჰექტარზე, ნუშის ბაღებს გააშენებს

საქართველოს ბანკთან პარტნიორობით, „Green Waves“ საგარეჯოში, 210 ჰექტარზე, ნუშის ბაღებს გააშენებს.

პროექტის ჯამური ინვესტიცია 17 მილიონი ლარია, საქართველოს ბანკის ინვესტიცია კი 11 მილიონ ლარს შეადგენს და ის საირიგაციო სისტემების მოწყობას, ნიადაგის მომზადების სამუშაოებს, სასოფლო – სამეურნეო ტექნიკისა და ნერგების შეძენას გულისხმობს.

მიმდინარე პროექტის ფარგლებში „Green Waves“ – ის ჯგუფი ყოველწლიურად 500 ტონამდე მოცულობის ნუშის მოსავალს ელის, რომლის რეალიზაციას საერთაშორისო ბაზარზე უზრუნველყოფს. ჯგუფს მასშტაბური გეგმები აქვს და სამომავლოდ ნუშის სამტვრევი, სორტირების და შეფუთვის საწარმოსა და სასაწყობო მეურნეობის მშენებლობას გეგმავს.

„ეს ერთ-ერთი ყველაზე მასშტაბური პროექტია საგარეჯოს რეგიონში და მიგვაჩნია, რომ ქართული ნუში მალე დაიმკვიდრებს თავს საერთაშორისო ბაზარზე. ჩვენ კი არ ვჩერდებით და აქტიურ რეჟიმში ვაგრძელებთ მსგავსი პროექტების და ბიზნესების მხარდაჭერას, განსაკუთრებით რეგიონებში.“ – განაცხადა საქართველოს ბანკის კორპორაციული გაყიდვების სექტორის უფროსმა ნინო აფციაურმა.