უჯარმის ციხე-ქალაქი კახეთში

ციხე-ქალაქი უჯარმა კახეთში, საგარეჯოს მუნიციპალიტეტში, სოფელ უჯარმასთან ახლოს მდებარეობს. ისტორიულ წყაროებში ის პირველად III საუკუნის ამბებთან დაკავშირებით იხსენიება.

უჯარმის დაარსების თარიღად III-IV საუკუნეთა მიჯნა, მეფე ასფაგურის მეფობის პერიოდი მიიჩნევა. IV -საუკუნიდან ის უკვე კახეთის ერთ-ერთ მთავარ ქალაქს წარმოადგენდა. V საუკუნეში ვახტანგ გორგასალმა უჯარმა თავის ერთ-ერთ რეზიდენციად აქცია. ამ პერიოდში კი ქალაქმა განსაკუთრებული აღმავლობა განიცადა. სპარსელებთან ბრძოლისას მძიმედ დაჭრილი ვახტანგ გორგასალი სწორედ უჯარმის ციხეში გარდაიცვალა.

ციხე-ქალაქის აღმშენებლობა-განმტკიცებაში დიდი წვლილი მიუძღვის დაჩი უჯარმელსაც. IV-VIII საუკუნეებში უჯარმა დიდ როლს ასრულებდა ქვეყნის ისტორიაში, თუმცა მომდევნო პერიოდში მისი ფუნქცია თანდათან მცირდება. 914 წელს უჯარმა არაბებმა აიღეს და დაარბიეს. მომდევნო წლებში ის უკვე ნაკლებად მონაწილეობს ქვეყნის ცხოვრებაში. საქართველოს სამეფო-სამთავროებად დაშლამ თანდათანობით შეასუსტა უჯარმის მნიშვნელობა და დაწინაურებული ქალაქი პატარა დაბად აქცია. ციხე-ქალაქი უჯარმა საქართველოს ერთ-ერთი უმნიშვნელოვანესი და გამორჩეული კულტურულ-ისტორიული ძეგლია.

უჯარმა მასშტაბური კომპლექსია და მოიცავს: სასახლეს, კოშკებს, ეკლესიას, დიდ შენობას, დიდ წყალსაცავს, მცირე წყალსაცავს და გალავანს. იგი მდინარე ივრის მარჯვენა სანაპიროზე მდებარე მაღალ გორაზეა აგებული და ივრის ვიწრო გასასვლელის ჩამკეტ კარიბჭეს წარმოადგენდა.

ფოტო : Georgian Travel Guide