საგარეჯოს მუნიციპალიტეტის გამგებელი და საბავშვო ბაღების თანამშრომლები ერთმანეთს უპირისპირდებიან
აღმზრდელის საშულო ხელფასი 240 ლარს შეადგენს და საარსებო მინიმუმს დაახლოებით 30 ლარით ჩამორჩება. საგარეჯოს მე-2 საბავშვო ბაღის აღმზრდელმა, ნინო პატაშურმა თანამშრომლების სახელით გამგებელს ხელფასის მომატების მოთხოვნით 2015 წლის ბიუჯეტის დამტკიცებამდე მიმართა, თუმცა საბიუჯეტო სახსრების ნაკლებობის მიზეზით მათთვის ანაზღაურების მომატების მოთხოვნა არ დააკმაყოფილეს. პატაშურის მტკიცებით, ამ მოთხოვნის დაფიქსირების შემდეგ თანამშრომლებს გათავისუფლებით და ჯგუფების შემცირებით დაემუქრნენ:
„გამგებელთან პირადად შევედი და ხელფასების მომატება ვთხოვე. მან კითხრა, რომ ბიუჯეტში არ არის თანხაო. მე ვუთხარი, როგორ არ არის მეთქი. თუ ასეთი ღარიბი რაიონია, ზუსტად დეკემბერში პრემიები დარიგდა 120 000 ლარის ოდენობით და თან 10 ადამიანზე. გარდა მაგისა, 36 შტატი დაამატეს და თუ არ არის ბიუჯეტში თანხა, საიდან უნდა გადაუხადონ მათ ეს თანხა. არა და ბიუჯეტში როგორ შეიძლება არ იყოს თანხა. სერიოზული ბუნებრივი რესურსი გააჩნია საგარეჯოს. როდესაც გამგებლის ოთახიდან გამოვედი, წამოვიდა ზეწოლა გამგებიდანაც და გაერთიანებიდანაც. სამუშაო საათებში მოგვიწია ბაღიდან გასვლა. ჩვენს მენეჯერს დაურეკეს, რომ არც ერთი თანამშრომელი არ გაუშვათო და ისიც მოთხოვეს, რომ გაეფორმებინა ბრძანება, სამუშაო საათებში როგორ გავიდაო და გაათავისუფლეთო“, – აცხადებს ნინო პატაშური.
ბაღების გაერთიანების ხელმძღვანელისაგან ზეწოლის შესახებ საუბრობს ამავე საბავშვო ბაღის მუსიკის მასწავლებელი, თეა თედიაშვილიც:
„ხელზე ვიღებ 217 ლარს. როდესაც დავინტერესდი, რატომ მაქვს ასეთი დაბალი ხელფასი, მაშინ როდესაც ჯგუფის მასწავლებელს, ფსიქოლოგს ჩემზე მეტი ანაზღაურება აქვთ. როდესაც ჩემი პრეტენზია დავაფიქსირე, ბაღის გაერთიანების ხელმძღვანელმა უკმაყოფილება გამოხატა და მითხრა, რატომ თქვიო. სამსახურიდან გაგათავისუფლებო“, – აცხადებს თეა თედიაშვილი.
მისი მტკიცებით, მას შემდეგ, რაც თანამშრომლებმა გაზეთ „კახეთის ხმის“ ჟურნალისტს მიზერული ანაზღაურების შესახებ ინფორმაცია მიაწოდეს, ბაღების გაერთიანების ხელმძღვანელმა მე-2 ბაღის მენეჯერს მზია ბეჟიტაშვილს დაურეკა და მოსთხოვა, თანამშრომლებისათვის ჟურნალისტებთან ამ საკითხის შესახებ საუბარი აეკრძალა.
„ბაღების გაერთიანების ხელმძღვანელმა შემოგვითვალა, გაჩუმდით თორემ სამსახურიდან გაგათავისუფლებთო“, – აცხადებს თეა თედიაშვილი.
საგარეჯოს საბავშვო ბაღების თანამშრომლებმა 50%-ით მომატებული ხელფასები წინასააღდგომოდ, ერთჯერადად, პრემიის სახით აიღეს. საგარეჯოს მე-2 საბავშვო ბაღის აღმზრდელის თანაშემწე, ნანა ბეჟიაშვილი ვარაუდობს, რომ პრემია იმ მიზნით ჩაერიცხათ, რომ მიზერული ანაზღაურების გამო უკმაყოფილება აღარ გამოეხატათ:
„ვართ 9-დან 5 საათამდე. ხშირად 6-ის ნახევრამდეც გვიწევს ყოფნა. გურჯაანში მოუმატეს ხელფასი. აღმზრდელის თანაშემწე ხელზე 300 ლარს იღებენ. როდესაც თანამშრომლებმადავწერეთ ხგანცხადება, ზეწოლა იყო ერთ-ერთ თანამშრომელზე, რატომ გავიდა სამუშაო საათებშიო. პრემიებსაც თითქმის არ გვაძლევენ. ეხლა სააღდგომოდ მოგვცეს ხელფასის ნახევარი. პრემია იმიტომ მოგვცეს, რომ გავჩუმებულიყავით“, – განმარტავს ნანა ბეჟიაშვილი.
ხელფასების მომატებას ითხოვენ საგარეჯოს 1-ლი ბაღის თანამშრომლები. ბაღის პერსონალი აცხადებს, რომ მიზერული ანაზღაურების გამო უამრავი პრობლემა ექმნებათ და ამის გამო ბანკი უარს ამბობს სესხის გაცემაზე, რის გამოც ისინი ელემენტარული საყოფაცხოვრებო პრობლემების მოგვარებას ვერ ახერხებენ. აღმზრდელი ნინო ოზგელდოვა განმარტავს, რომ საკრებულოს თხოვნის მიუხედავად გამგებელი თანამშრომლებისათვის შრომის ანაზღაურების გაზრდის წინააღმდეგია:
„ჩვენ კიდევ არა გვიჭირს 246 ლარი გვაქვს. რადგან ამ ოდენობის ხელფასი მაქვს, ბანკი მაძლევს კრედიტს. ჩვენს თანაშემწეებს აქვს 200 ლარის ოდენობის ხელფასი. როდესაც მათ საყოფაცხოვრებო ტექნიკის შეძენა უნდათ ან მედიკამენტოზური მკურნალობა ან სხვა რაიმე და სურთ კრედიტის გამოტანა, ბანკი ასეთ დაბალ ხელფაზე არ გასცემს სესხს. ჩვენ მივმართეთ საკრებულოს და თინათინ ხიდაშელს, რომელთანაც პირადად შეხვედრას ვითხოვდით. საკრებულომ გვითხრა, რომ უნდა მოგვმატებოდა, მაგრამგამგებელმა უარი განაცხადა. ასეთი ინფორმაცია მოგვივიდა“, – აღნიშნავს ნინო ოზგელდოვა.
ბაღის ერთ-ერთი აღმზრდელის თანაშემწე, ვენერა საგინაშვილი საგარეჯოს მუნიციპალიტეტის გამგებელს, გიორგი გზირიშვილს ხელფასების მნიშვნელოვანი ზრდის შესახებ წინასაარჩევნო დაპირებას ახსენებს და მოითხოვს, რომ შრომის ანაზღაურება საარსებო მინიმუმს მაინც გაუთანაბრდეს. საგინაშვილი გამგებელს უყურადღებობაშიც ადანაშაულებს და აცახდეს, რომ გიორგი გზირიშვილი მათი პრობლემით არასოდეს დაინტერესებულა:
„მანამდე წინასაარჩევნოდ დიდი დაპირება იყო, რომ ოღონდ მხარი დაგვიჭირეთ და ხელფასებს მოგიმატებთ. დაიმედებული ვიყავით, რომ სანამ ბიუჯეტი დამტკიცდებოდა, ხელფასს მოგვიმატებდნენ. ისიც კი გვითხრეს, რომ 50% თუ არა 30% მაინც მოგემატებათო, მაგრამ ყველაფერმა ისე ჩაიარა. გამგებელი ამბობს, ჩვენ არაფერს დავპირებულვართო. ერთხელ მოსულიყო, დაინტერესებულიყო ჩვენი პრობლემით და ეკითხა, რა გიჭირთ დარატომ დაობთო. ჩვენს ქუჩაზე ადის და ჩადის. ხომ უნდა მოსულიყო და ეკითხა. თავის თანამშრომლებს როგორ მოუმატა ხელფასები? რის საფუძველზე? თვითონ რა გააკეთა რომ მოვიდა? მარტო კაბინეტი ჩაიბარა? ჩვენ კი მართლა ვმუშაობთ. საპასუხისმგებლო საქმე გვაქვს და იმ მცირეოდენს ვითხოვთ“, – აღნიშნავს ვენერა საგინაშვილი.
სკოლამდელი დაწესებულების პერსონალი ითხოვს განმარტებას, რომ თუ სახელფასო ზრდისათვის ბიუჯეტში არ არის საკმარისი თანხა, როგორ გამოიყო საკრებულოსა და გამგეობის თანამშრომლებისათვის ოთხი თვის განმავლობაში პრემიის სახით 200 000 ათასი ლარი:
„როდესაც ბიუჯეტი შედგა, იმედი გვქონდა, მოგვემატებოდა ხელფასი, მაგრამ ანაზღაურების მომატებას ვინ ჩივის? ხელფასი იანვრის თვეში დაგვიგვიანეს შეგნებულად და ავიღეთ 31 იანვარს. შესაბამისად პრობლემების შეგვექმნა ბანკში და დაგვიანების გამო გადავიხადეთ ჯარიმა. ამის შემდეგ ხელფასის მომატების მოთხოვნით კვლავ მივმართეთ გამგებელს და თან უთხარით, რომ გურჯაანში თანამშრომლებს ხელფასი მოემატათ. მან გვითხრა, რომ ამჟამად ბიუჯეტში არ არის თანხებიო. არა და როგორ არ იყო, დეკემბრის თვეში და სააღდგომოდაც მთლიანობაში გამოწერეს დაახლოებით 200 000 ლარი პრემია“, – აღნიშნავს 1-ლი ბაღის თანამშრომელი, მანანა კახელიშვილი.
საგარეჯოს ბაღების გაერთიანების ხელმძღვანელი ელზა გილაშვილი აცახდებს, რომ აღნიშნულ თანამდებობაზე მისი დანიშვნის შემდეგ სკოლამდელი დაწესებულების პერსონალს ხელფასი 50%-ით მოემატა და ამჟამად კი ბიუჯეტში არსებული თანხის სიმცირის გამო მათთვის შრომის ანაზრაურების გაზრდა ვერ ხერხდება რაც შეეხება თანამშრომლებზე ზეწოლას. ელზა გილაშვილი თანამშრომლებზე მუქარის ფაქტებსა და ჯგუფების შესაძლო შემცირებას უარყოფს და მათ დეზინფორმაციის გავრცელებაში ადანაშაულებს:
„2013 წელს სახელმწიფომ გამოგვიყო ტრანსფერი და ერთ ჯერზე გაეზარდათ 30%-ით, შემდეგ – 20%-ით. ნამდვილად დაბალი აქვთ ხელფასი. არ არის საკმარისი და მითუმეტეს ამ პირობებში, მაგრამ ბიუჯეტში არ იყო გათვალისწინებული ეს თანხა. თქვენ მკითხეთ თანამშრომლებზე ზეწოლის შესახებ. ეგ ყველაფერი ტყულია. ჯგუფების შემცირებაზე ნამდვილა არ არის საუბარი. ნამდვილად არ მინდა ჯგუფი შევამცირო. მე-2 ბაღში არ არის იმის საშუალება, რომ 7 ჯგუფი მოთავსდეს. მე მაგათ მაგას ვეუბნები. მენეჯერს ვუთხარი, რომ თხოვნით მოგვმართოს და ჩვენ გამგეობასთან ვუშუამდგომლოთ, რომ რაღაც საშუალება გამოიძებნოს. ბავშვები დარბაზში სხედან. ჯგუფი არ აქვთ“, – განმარტავს ელზა გილაშვილი.
საგარეჯოს მუნიციპალიტეტის გამგებელი ბაღის თანამშრომლებს ხელფასის მომატების პირობას აზლევს, მაგრამ არა ახლო მომავლის პერსპექტივით. გზირიშვილის განმარტავს, რომ ბაღის პერსონალის ხელფასების მომატებისათვის ადგილობრივ ბიუჯეტში საკმარისი თანხა არ არის. ამასთანავე გიორგი გზირიშვილი ეხმაურება თანამშრომლებზე ზეწოლის შესახებ მედიით გავრცელებულ ინფორმაციას და პერსონალისგან კონკრეტული ფაქტების შესახებ ინფორმაციის მიწოდებას ითხოვს:
„ამ ეტაპზე ეს საკითხი განხილვის საგანია. ჩვენ ძალიან ბევრ პროექტს ვახორციელებთა და მარტო ბაღები არ არის. აქედან გამომდინარე, როგორც კი ბიუჯეტი ამის შესაძლებლობას მოგვცემს, ჩვენ აუცილებლად მოვუმატებთ მათ ხელფასს. რაც შეეხება ზეწოლას. დამისახელონ კონკრეტული პიროვნებები და მივიღებ შესაბამის ზომებს“, – აცხადებს გიორგი გზირიშვილი.
მაშინ როდესაც გზირიშვილი საბიუჯეტო სახსრების ნაკლებობაზე საუბრობს, წინასაახალწლოდ და სააღდგომოდ გამგეობისა და საკრებულოს თანამშრომლებისათვის 203 000 ლარი გამოიყო. იმ შემთხვევაში თუ შრომის ანაზღაურების ზრდის მოთხოვნა არ დაკმაყოფილდა, ბაღის პერსონალი გაფიცვითა და მასობრივი საპროტესტო აქციებით იმუქრება.
გიორგი გზირიშვილი, საგარეჯოს მუნიციპალიტეტის გამგებელი