როგორი იქნება ქალაქ თელავის განვითარების გენერალური გეგმა

თელავის მერია ქალაქის განვითარების გენერალურ გეგმაზე მუშაობს.  ამჟამად, სამუშაო ჯგუფი ექსპერ­ტებთან და კომპეტენტურ პირებთან ერთად იმ მნიშვნელოვან საკითხებს იკვლევს, რომელიც ქალაქის განვი­თარების გეგმის შედგენას უძღვის წინ.
თელავის მერის – პლატონ კალ­მახელიძის თქმით, გეგმის გაწერა დიდ დროს მოითხოვს:
,,გავიარეთ კონსულტაციები კომ­პეტენტურ პირებთან, იმ საკითხებზე, თუ საიდან უნდა დაიწყოს ქალაქის განვითარების გეგმაზე მუშაობა და რა უნდა გაკეთდეს ამისთვის. ამ კუ­თხით გადადგმულია მნიშვნელოვანი ნაბიჯები. ის ტექნიკა კი, რომელიც გეგმის ძირეულად დამუშავებაში დაგვჭირდება, მოვითხოვეთ დამეგო­ბრებული ქალაქიდან, ბიბერახიდან, რითაც ბიუჯეტიდან გარკვეული თანხა დაიზოგება.’’
ქალაქის ვიცე-მერ თენგიზ მთვა­რელიშვილის თქმით, ქალაქის გან­ვითარების გენერალური გეგმის დამუშავება და დაწერა ერთი მხრივ, მოითხოვს მეტ ადამიანურ რესურსს, მეორე მხრივ კი, საერთაშორისო ექს­პერტების ჩამოყვანას და აღნიშნულ პროცესში ჩართვას.
-,,სამუშაო ჯგუფი მუშაობის შედეგად გამოიკვეთა, რომ აუცილე­ბელია ქალაქის აღწერა. გაგზავნილი გვაქვს წერილი დამეგობრებულ ქა­ლაქ ბიბერახთანაც, სადაც ასახულია ის მიმართულებები და კონცეფცია, რასაც ჩვენ ვფიქრობთ ქალაქის განვითარებისთვის, ასევე ვთხო­ვეთ, რომ გადმოგვცენ შესაბამისი აღჭურვილობა, რომელიც დაგვეხმა­რება აღნიშნულ პროცესში, კერძოდ, აღწერის, ელექტრონული ბაზის შესაქმნელად და სხვა.’’
თელაველების თქმით, ქალაქის განვითარების გეგმის შემუშავებაში, ხელისუფლების წარმომადგენ­ლებთან ერთად არასამთავრობო ორგანიზაციები, მედიის წარმომად­გენლები და რიგითი თელაველები უნდა იყვნენ ჩართული.
თელაველ მაია წიგნაძის თქმით, ქალაქის დაგეგმვა საკმაოდ რთუ­ლი ტექნიკური და პოლიტიკური პროცესია. მისი აზრით, იდეალური მოდელები არ არსებობს და საუკე­თესო გადაწყვეტილება ქალაქის ინდივუალურობის შენარუნებაა.
-,,ურბანული განვითარება ხშირად სპონტანური და ქაოტურია, თუმცა გამიზნულად დაგეგმილი ქალაქებისა და დასახლებების მაგალითები ან­ტიკურ ხანამდეც არსებობდა, სადაც სახლები დაცული იყო ხმაურის, სუნისა და ქურდებისგან, ჰქონდა საკუთარი ჭები და სანიტარული კვანძები. ამგვარ ქალაქებს ჰქონდა კანალიზაცია, დრენაჟი, ვრცელი სა­საწყობო მეურნეობა, წყლის რეზერ­ვუარები და კარგად განვითარებული ინფრასტრუქტურა. ჩემი აზრით, ქალაქის დაგეგმარებისას ყურადღება გამახვილდება ქალაქის ინდივი­დუალურობაზე, გეოგრაფიულ და ფიზიკურ მახასიათებლებზე, ქალაქის ყოფასა და ძირითად საქმიანობებზე, ასევე ბუნებრივი, ხელოვნებისა და ისტორიული მემკვიდრეობის პატი­ვისცემაზე, ფეხით მოსიარულეთა და ტრანსპორტის სხვა საშუალებების ორგანულ შერწყმაზე. რაც შეეხება დაგეგმარებაში მონაწილეობას, სა­სურველია, რომელიმე დამეგობრე­ბული ქალაქის მაგალითის აღება, თუნდაც მათი რეკომენდაციების გათვალისწინება (ბიბერახი, საფლე) და სპეციალური საბჭოს შექმნა, სა­დაც შევლენ პროფესიონალები, შეი­ქმნება გეგმა, შემდეგ საზოგადოებას გააცნობენ და რეკომენდაციების მიიღებენ.’’
თელავის მკვიდრ სოსო მიქელაძის თქმით კი, აუცილებელია ქალაქის განვითარების გეგმაში თელავის ეკონომიკური პოტენციალი გამოი­კვეთოს მიგრაციის შენელებითა და ეფექტური ლიბერალურ-ეკონო­მიკური პოლიტიკის წარმოებით.
-,,გეგმის შემუშავების პროცესში, უნდა ჩაერთოს ყველა აქტიური მოთამაშე, მით უმეტეს პატარა ქა­ლაქებთან მუშაობის გამოცდილების მქონე უცხოელი ექსპერტები და არა ის პირები, ვისზეც მხოლოდ ფულია გასაწერი. მანამდე კი, კარგი იქნება ქალაქის პრობლემების იდენტი­ფიკაციის პროცესის დაწყება.’’
გარემოს დაცვის ექსპერტის ჶ თე­ლაველ კახა სუხიტაშვილის თქმით, თელავის განვითარების გეგმაში დაწვრილებით უნდა აღიწეროს ინ­ფრასტრუქტურული განვითარების, გარემოს დაცვის კუთხით არსებული პრობლემების მოგვარების, ტურიზ­მისა და სხვა პრობლემების შესახებ.
-,,ამ პროცესში ყველა დაინტერე­სებულმა მხარემ, თვითმმართველო­ბამ, სამინისტროებმა, სამოქალაქო სექტორმა და სპეციალისტებმა უნდა მიიღონ მონაწილეობა.’’