ევროკავშირი საქართველოს მილსადენების მოწყობილობების და ფოლადის სპეციალური კონსტრუქციების რეექსპორტის გაკონტროლებისკენ მოუწოდებს

ევროკავშირი საქართველოს მილსადენების მოწყობილობების და ფოლადის სპეციალური კონსტრუქციების რეექსპორტის გაკონტროლებისკენ მოუწოდებს – ამის შესახებ აღნიშნულია სანქციების საკითხებში დევიდ ო’სალივანის წერილში, რომელიც მან საქართველოს ეკონომიკისა და საგარეო საქმეთა მინისტრებს გაუგზავნა.

წერილში ო’სალივანი საქართველოს ხელისუფლებას მადლობას უხდის სანქციების რეჟიმის პირნათლად შესრულებისთვის.

როგორც სალივანი აღნიშნავს, მილსადენების მოწყობილობები და ფოლადის სპეციალური კონსტრუქციები რუსეთის ნავთობის მოპოვების სექტორის მიერ გამოიყენება და ევროკავშირს EU-დან ამ საქონლის ექსპორტზე შეზღუდვა აქვს დაწესებული. შესაბამისად, წერილში ნათქვამია, რომ ამ მიმართულებით იმპორტისა და რეექსპორტის ნაკადები მნიშვნელოვანია საქართველომაც გააკონტროლოს.

“მადლობას გიხდით ამ ნივთების რეექსპორტის შეჩერებაზე გაწეული ძალისხმევისთვის. ევროკომისიამ შეადგინა ეკონომიკურ კონტექსტში კრიტიკული მნიშვნელობის მქონე საქონლის სია, რომლის შეძენასაც რუსეთი სასოწარკვეთილად ცდილობს თავისი საომარი მოქმედებების უზრუნველსაყოფად.

ვიმედოვნებთ, რომ ეს ინფორმაცია სასარგებლო იქნება თქვენი შესაბამისი ორგანოებისთვის, რათა გაგრძელდეს შესაბამისი ზომების მიღება და სანქცირებული საქონლის რეექსპორტი აღარ მოხდეს რუსეთში, სადაც მისი გადამისამართება ხდება სამხედრო ინდუსტრიის მხარდასაჭერად. გმადლობთ ამ საკითხისადმი თქვენი მყისიერი ყურადღებისთვის“, – აღნიშნულია დევიდ ო’სალივანის წერილში.