გზა ევროპისკენ

რეგიონების გათანაბრება ევროკავშირთან დადებული ასოცირების ხელშეკრულების ერთ-ერთი მნიშვნელოვანი საკითხია. ასოცირების ხელშეკრულების 21-ე თავი რეგიონულ განვითარებას, მრავალდონაინი თვითმმართველობის ხელშეწყობას და რეგიონებს შორის დისბალანსის აღმოფხრას ითვალისწინებს.

საქართველოს პარლამენტის რეგიონული პოლიტიკისა და თვითმმართველობის კომიტეტმა შეიმუშავა 2018-2020 წლების სამოქმედო გეგმა და სტრატეგია, რომლის მთავარი მიზანია დეცენტრალიზაციისა და ადგილობრივი თვითმმართველობის გაძლიერება, რაც ევროკავშირთან დადებული ასოცირების ხელშეკრულებით არის განსაზღვრული. 

ევროკავშირი საქართველოს რეგიონების განვითარების, კანონმდებლობის დახვეწის და ადგილობრივი და ცენტრალური ხელისუფლების გაძლიერების შესაძლებლობას აძლევს. 

რეგიონებს შორის უთანაბრობა არა მარტო საქართველოს, არამედ ბევრი ევროპული ქვეყნის ერთ-ერთი მთავარი გამოწვევაა. 

ადგილობრივი თვითმმართველობის დეცენტრალიზაციის ახალი სტრატეგია, რომელიც საქართველოს პრემიერ-მინისტრმა 5 მარტს წარადგინა, მუნიციპალიტეტებისთვის ფინანსური რესურსების გაზრდასა და მის განკარგვაზე უფლებამოსილების მიცემას ითვალისწინებს.