წინასაარჩევნო გარემო სამი წლის წინ და დღეს
რესპუბლიკელი თამარ ხიდაშელი კი კონკურენტუნარიან წინასაარჩევნო გარემოზე მიუთითებს და უპრეცედენტო დემოკრატიულ არჩევნებს პროგნოზირებს. სანამ საგარეჯოელები 2015 წლის 31 ოქტომბრის პარლამენტის შუალედური არჩევნების მოლოდინზე დაიწყებენ საუბარს, ისინი ჯერ იხსენებენ 2012 წლის უმაღლესი საკანონმდებლო ორგანოს არჩევნებს.
გამოკითხულთა უმრავლესობა აღნიშნავს, რომ წინა საპარლამენტო არჩევნებზე ხმის მიცემის უფლება არავის შეუზღუდავს. საგარეჯოელები პოლიტიკური პარტიების წარმომადგენლებისგან მათზე ზეწოლისა და არჩევნების დღეს აგიტაციის ფაქტებს გამორიცხავენ, თუმცა ამბობენ, რომ საარჩევნო პროგრამებზე სრულყოფილი და დეტალური ინფორმაცია არ ჰქონიათ. იორმუღანლოელები ამბობენ, რომ 2012 წელს სახელისუფლებო კანდიდატზე შეაჩერეს არჩევანი. „ჩვენთან ეგეთი რაღაც არ ხდება ხოლმე. ჩვენ ვაძლევთ ხმას იმ პარტიას, ვინც გვინდა. ჩვენ მაშინ მთავრობას დავუჭირეთ მხარი“, – აღნიშნავს სოფელ იორმუღანლოს მკვიდრი გურბან ყურბანოვი.
სოფელ მზისგულში მცხოვრები მარგო გაბრიელაშვილი კი ღიად საუბრობს 2012 წლის წინასაარჩევნო პერიოდში კოალიცია „ქართული ოცნების“ წარმომადგენლების მხრიდან მოსახლეობის მოსყიდვის შესახებ, თუმცა კონკრეტულ ფაქტებს ვერ იხსენებს. „ძალიან კარგად მახსოვს, რომ ივანიშვილმა დაარიგა ორიათასები ოღონდ ხმა მომეცითო. ხალხი მოწმეა. ამ სოფელში აიღეს კიდეც ორიათასები“, – აცახდებს მარგო გაბრიელაშვილი(სტილი დაცულია).
საგარეჯოს მუნიციპალიტეტის მოსახლეობისაგან განსხვავებით, არასამთავრობო ორგანიზაციები, რომლებიც წინასაარჩევნო გარემოსა და არჩევნების დღეს მონიტორინგს ახორციელებდნენ, უხეში დარღვევების კონკრეტულ ფაქტებს ასახელებენ. ,,საქართველოს ახალგაზრდა იურისტთა ასოციაციის მიერ გამოქვეყნებულ ანგარიშში კოალიცია „ქართული ოცნების“ რამდენიმე ადამიანის უკანონო დაპატიმრების ფაქტებია მოცემული. მაგალითად, საგარეჯოს რაიონული პოლიციის თანამშრომლებმა გია მამისაშვილმა და ბექა როსტიაშვილმა დააკავეს 2012 წლის 25 სექტემბერს #41 საარჩევნო უბნის კომისიისა და პოლიტიკური კოალიცია „ქართული ოცნების“ წევრი ნათიკ რასულოვი, რომელსაც სასამართლომ ადმინისტრაციული პატიმრობა 40 დღე-ღამის ვადით შეუფარდა.”
სასამართლომ დაადგინა, რომ ნათიკ რასულოვმა ჩაიდინა საქართველოს ადმინისტრაციულ სამართალდარღვევათა კოდექსის 173ე მუხლით გათვალისწინებული სამართალდარღვევა, კერძოდ, სამსახურებრივი მოვალეობის შესრულების დროს სამართალდამცავი ორგანოს მუშაკის კანონიერი განკარგულების ან მოთხოვნისადმი ბოროტი დაუმორჩილებლობა. საია მიუთითებს, რომ ნათიკ რასულოვის სამართალდამრღვევად ცნობისას, პირველი ინსტანციის სასამართლომ მხედველობაში არ მიიღო ადმინისტრაციულ სამართალდარღვევათა კოდექსის მთელი რიგი ნორმები, რასაც მოჰყვა დაუსაბუთებელი და უკანონო დადგენილების მიღება. ეს არ არის რასულოვისათვის თავისუფლების აღკვეთის ერთადერთი ფაქტი. მანამდე 17 აგვისტოს „ქართული ოცნების“ აქტივისტებს ნათიკ რასულოვსა და ქალამადინ მამედოვს წვრილმანი ხულიგნობის ბრალდებით ადმინისტრაციული პატიმრობა 15 დღის ვადით შეეფარდათ. ამ საქმეშიც საია ადმინისტრაციული პატიმრობის უკანონოდ შეფარდებას მიუთითებს, რადგან სასამართლოს მიერ მიღებული დადგენილება ეყრდნობა მხოლოდ პოლიციელის ჩვენებას, რაც დაუშვებელია და საფრთხის ქვეშ აყენებს ნებისმიერი ადამიანის თავისუფლება.
საგარეჯოელები ამბობენ, რომ 2015 წლის შუალედური არჩევნები დემოკრატიული პრინციპების დაცვით ჩაივლის, თუმც წინასწარ უჭირთ პროგნოზირება, ვინ გახდება მაჟორიტარი დეპუტატი. სოფელ იორმუღანლოს ზოგიერთი მცხოვრები კი გამარჯვებას კოალიცია „ქართული ოცნების“ მაჟორიტარი დეპუტატობის კანდიდატს უწინასწარმეტყველებს. ისინი ამბობენ, რომ წინასაარჩევნო გარემო მშვიდ ვითარებაში მიდის და არც ერთი პოლიტიკური პარტიის წარმომადგენლები მათზე ზეწოლას არ ახდენენ, თუმცა ადგილობრივები კანდიდატებს ნაკლებ კომუნიკაციას უწუნებენ. მოსახლეობა აცხადებს, რომ ზოგიერთი კანდიდატის შესახებ ინფორმაციას საერთოდ არ ფლობს.
„ჩვენთან მთავრობა იმარჯვებს ხოლმე. აბა მაშ როგორ? პენსია ვინ უნდა მომცეს?“, აღნიშნავს ახმედ მამედოვი.
მოსახლეობისაგან განსხვავებით, საქართველოს პატრიოტთა ალიანსის ლიდერი ირმა ინაშვილი მმართველი პარტიის მხრიდან საუბრობს ადმინისტრაციული რესურსის გამოყენებაზე. ინაშვილი ამბობს, რომ თამარ ხიდაშელის წინასაარჩევნო კამპანიაში მონაწილეობენ საჯარო სკოლების, ბაგა-ბაღების დირექტორები, მასწავლებელბი და სოფლების რწმუნებულები. მისი შეფასებით, ეს საარჩევნო კანონმდებლობის უხეში დარღვევაა. მაჟორიტარი დეპუტატობის კანდიდატი,, საქართველოს პატრიოტთა ალიანსიდან, ასევე, ყურაღებას ამახვილებს საგარეჯოს რაიონული პოლიციის თანამშრომლებისაგან მოსახლეობის დაშინებაზე და იძულებაზე, მხარი დაუჭირონ თამარ ხიდაშელს. სახელისუფლებო გუნდის კანდიდატი კი ინაშვილის ბრალდებებს უარყოფს, კონკურენტუნარიან წინასაარჩევნო გარემოზე მიუთითებს და უპრეცედენტო დემოკრატიულ არჩევნებს პროგნოზირებს.