საგარეჯოში მომხდარი შემთხვევის თვითმხილველი პირები სამართალდამცავებმა პოლიციის განყოფილებაში გამოკითხვაზე გადაიყვანეს

საგარეჯოში მომხდარი შემთხვევის თვითმხილველი პირები სამართალდამცავებმა პოლიციის განყოფილებაში გამოკითხვაზე გადაიყვანეს.

გამოკითხვაზე იმყოფება ასევე, იმ ყოფილი სამხედროს შვილიც, რომელმაც მეზობლებსა და პოლიციას ცეცხლი გაუხსნა.

რაც შეეხება ადგილზე არსებულ ვითარებას – კორპუსში, სადაც მოქალაქეებზე თავდასხმა განხორციელდა, ექსპერტ-კრიმინალისტები საგამოძიებო მოქმედებებს ამ დრომდე ახორციელებენ.

შეგახსენებთ, შინაგან საქმეთა სამინისტროს ინფორმაციით, საგარეჯოში მომხდარი შემთხვევის შედეგად გარდაიცვალა 5 და დაიჭრა კორპუსის ეზოში მყოფი 5 ადამიანი. გარდაცვლილთაგან 1 პოლიციელი, 4 კი იმ კორპუსის მცხოვრებია, სადაც ყოფილმა სამხედრომ ცეცხლი გახსნა.

ამასთან, როგორც უწყების მორიგ განცხადებაშია ნათქვამი, გამოძიების ინფორმაციით, საცხოვრებელი კორპუსის ერთ-ერთი ბინის აივნიდან რამდენიმე გასროლა 1974 წელს დაბადებულმა ნ.ა. განახორციელა. მათივე ცნობით, აღნიშნულმა პირმა, მოგვიანებით, სპეცდანიშნულების რაზმის გამოჩენისთანავე, სავარაუდოდ, თვითლიკვიდაცია განახორციელა.