გერმანია საქართველოს 56 მლნ ევროთი დააფინანსებს – თანხა სკოლების ენერგოეფეტურობას მოხმარდება

გერმანიის ეკონომიკური თანამშრომლობის და განვითარების მინისტრმა, ქალბატონმა სვენია შულცემ მონაწილეობა მიიღო „საქართველოს საჯარო შენობების ენერგოეფექტურობის ღია პროგრამის“ დაფინანსების ხელშეკრულებების ხელმოწერის ცერემონიაში.

დაფინანსების ხელშეკრულებებს ხელი მოაწერეს, ერთი მხრივ, რეკონსტრუქციის საკრედიტო ბანკმა (KfW) გერმანიის მთავრობის სახელით და მეორე მხრივ, საქართველომ, რომელიც წარმოდგენილი იყო ფინანსთა სამინისტროს და რეგიონული განვითარებისა და ინფრასტრუქტურის სამინისტროს მიერ. ამ ხელშეკრულებებით ხელმისაწვდომი ხდება 55,85 მილიონი ევროს ოდენობის დაფინანსება, რომელიც გამიზნულია საჯარო შენობების რეაბილიტაციისთვის მათი ენერგოეფექტურობის სტანდარტებთან დასაახლოებლად.

გერმანიის საელჩოს ინფორმაციით, „ღია პროგრამის“ მთავარი ამოცანაა სკოლის შენობების მდგრადი და სრული რეაბილიტაცია მათი ენერგოეფექტიანობის გაუჯობესების და მომხმარებელთა კმაყოფილების გაზრდის მიზნით. მთელი ქვეყნის მასშტაბით მრავალი საჯარო სკოლის შენობების განახლებაში ენერგოეფექტიანობის ახალი სტანდარტების გამოყენების გზით, ეს პროექტი ხელს უწყობს ენერგოეფექტიანობის მექანიზმის გაუმჯობესებას და ევროკავშირის შესაბამისი დირექტივების განხორციელებას.

“განახლების ასეთი ღონისძიებები გამოიწვევს ენერგიის მოხმარების ოპტიმიზაციას და ნახშირორჟანგის გამოყოფის შემცირებას სამიზნე შენობებში. გარდა ამისა, ამ ღონისძიებების შედეგად გახანგრძლივდება შენობის ექსპლუატაციის ვადა, გაუმჯობესდება ჯანმრთელობის, უსაფრთხოების და კომფორტის დონე. ეს კი შესაძლებლობას მისცემს სკოლის მასწავლებლებსა და მოსწავლეების, იმუშაონ და ისწავლონ უკეთეს პირობებში.

„ღია პროგრამა“ ევროპის გუნდის უფრო ფართო, ევროპის რეკონსტრუქციისა და განვითარების ბანკის და ევროკავშირის მონაწილეობით შემუშავებული ერთობლივი ინიციატივის შემადგენელი ნაწილია. მიმდინარე წლის დასაწყისში ევროპის რეკონსტრუქციისა და განვითარების ბანკმა 40 მილიონ ევრომდე ოდენობის კრედიტი გამოყო, ხოლო ევროკავშირმა 13 მილიონი ევროს ოდენობის გრანტი, რომლებიც ამ პროგრამის განხორციელებას შეუწყობს ხელს”,- ნათქვამია პრესრელიზში.