“მთავრობას სწრაფადაც შეუძლია მოქმედება, ამის მაგალითია ინსპექტორის სამსახურის გაუქმება”

ამერიკის შეერთებული შტატების ელჩის, კელი დეგნანის განცხადებით, სურვილის შემთხვევაში, საქართველოს მთავრობას სწრაფი მოქმედების უნარი შესწევს და ეს შესაძლებლობა მომდევნო ექვსი თვის განმავლობაში მაქსიმალურად უნდა იქნეს გამოყენებული ევროკავშირის მიერ წარმოდგენილი რეფორმების გასატარებლად, რათა ქვეყანამ კანდიდატის სტატუსის მიღება რაც შეიძლება სწრაფად შეძლოს.

კელი დეგნანმა ასევე აღნიშნა, რომ კანონმდებლობის სწრაფად შეცვლის უნარი მთავრობამ არაერთხელ გამოავლინა და ამის ორი თვალსაჩინო და არასახარბიელო მაგალითი სახელმწიფო ინსპექტორის სამსახურის გაუქმება და მიყურადების კანონმდებლობის გაფართოებაა.

„ჩვენ კარგად ვიცით, რომ საქართველოს მთავრობას, სურვილის შემთხვევაში, კანონების დამტკიცება სწრაფადაც შეუძლია, ამის მაგალითი სახელმწიფო ინსპექტორის სამსახურის გაუქმება და მიყურადების შესაძლებლობების გაზრდაა.

აშშ გამოხატავს მზაობას – დაეხმაროს საქართველოს ამ პროცესში. მომდევნო ექვსი თვე უმნიშვნელოვანესია რეფორმების გასატარებლად, დასაკარგი დრო არ არის!“, – განაცხადა დეგნანმა.