პრეზიდენტმა მოსმენების კანონს ვეტო დაადო

7 ივნისს პარლამენტმა სისხლის სამართლის საპროცესო კოდექსში ცვლილებების პროექტს მესამე მოსმენით მხარი დაუჭირა. არასამთავრობო ორგანიზაციებმა კანონპროექტი ჯერ კიდევ განხილვის ეტაპზე კრიტიკულად შეაფასეს. როგორც ისინი აცხადებდნენ, შესაძლებელი ხდება სისხლის სამართლის კოდექსის არაერთი მუხლით მიმდინარე გამოძიების შემთხვევაში მოქალაქეებს უვადოდ უსმინონ და მათ ამის შესახებ არ შეატყობინონ. მათი შეფასებით, მაშინ, როდესაც არ არსებობს კანონით გათვალისწინებული კონტროლის ეფექტიანი მექანიზმი, შემოთავაზებული ცვლილებები არსებითად აუარესებს ადამიანის პირადი ცხოვრების დაცულობის სტანდარტს და შესაძლებელს ხდის საგამოძიებო უწყებების მხრიდან უვადო ფარული მოსმენების განხორციელებას.

ერთობლივ განცხადებაში არასამთავრობო ორგანიზაციები აღნიშნავდნენ, რომ კანონი არ შეესაბამება ადამიანის უფლებათა დაცვის საერთაშორისო ნორმებს. ორგანიზაციები გამოყოფენ რამდენიმე გარემოებას:

“ფარული მოსმენები 77 [ტიპის] დანაშაულზე შეიძლება უვადოდ განხორციელდეს და რიგი დანაშაულების შემთხვევაში პირმა შესაძლოა 30 წელიც ვერ შეიტყოს, რომ მის მიმართ ფარული მიყურადება ხორციელდებოდა. შესაბამისად, ვერასდროს გამოიყენოს გასაჩივრების უფლება, ვერ ისარგებლოს სამართლიანი სასამართლოს უფლებით და ვერ დაიცვას პირადი ცხოვრების ხელშეუხებლობის უფლება”;

“საკანონმდებლო ცვლილებების თანახმად, ფარული საგამოძიებო მოქმედებების მაქსიმალური ვადა 6 თვიდან 9 თვემდე იზრდება და დანაშაულთა ჩამონათვალს, რომელზეც ფარული თვალთვალი შეიძლება განხორციელდეს, 27 ნაკლებად მძიმე დანაშაულიც ემატება”.

განცხადების ავტორები ამბობენ, რომ ფარულ მოსმენებთან დაკავშირებულ კანონმდებლობას ისედაც ჰქონდა არაერთი ხარვეზი, რის გამოც საკონსტიტუციო სასამართლოს მიმართეს, თუმცა გადაწყვეტილება ოთხი წელია არ გამოცხადებულა.