საქართველოს პარლამენტის დელეგაცია უკრაინაში უახლოეს დღეებში გაემგზავრება

საქართველოს პარლამენტის თავმჯდომარემ, ბიუროს სხდომაზე, უკრაინაში უახლოეს დღეებში დაგეგმილ ვიზიტზე საუბრისას განაცხადა, რომ მას და უკრაინის რადას სპიკერს შორის მეგობრული და თბილი საუბარი შედგა და რუსლან სტეფანჩუკმა ქართველი კოლეგა უკრაინაში კიდევ ერთხელ მიიწვია.“ბევრ საკითხში გავერკვიეთ. მან დაადასტურა საკუთარი მიწვევა, რომ ვეწვიო უკრაინას და იქ გამოვხატოთ ჩვენი სოლიდარობა უკრაინელი ხალხის მიმართ. ეს ვიზიტი, ალბათ, უახლოეს დღეებში შედგება. ახლა ვარკვევთ ორგანიზაციულ საკითხებს.

ჩემი სურვილი იყო, რომ პარლამენტის თავმჯდომარის დელეგაცია ყოფილიყო მრავალპარტიული – გვქონდა საუბარი ოპოზიციის წარმომადგენლებთან. შეთავაზება გვქონდა, თანაბარი წარმომადგენლობა ყოფილიყო, თუმცა, არ იყო თანხმობა და შემდეგ, კვლავ შევთავაზეთ, რომ თითო პოლიტიკური ჯგუფიდან იყოს თითო წარმომადგენელი.

მართალია, ამ შემთხვევაში, უმრავლესობამ თანხმობა განაცხადა, რომ თავის მხრივ, არ გაიზარდოს წარმომადგენლობა, თანაბრობის პრინციპი ამ შემთხვევაში დაირღვევა და ოპოზიციური უმრავლესობის დელეგაცია იქნება.

თხოვნა მექნება ოპოზიციის წარმომადგენლებთან, რომ დროულად მოგვაწოდონ საკუთარი კანდიდატები ამ დელეგაციისთვის. მექნება კომუნიკაცია ყველა პოლიტიკურ ჯგუფთან, ვინაიდან ორგანიზაციულად გვესმის ყველას, რომ არ არის ადვილი ამ ვიზიტის ორგანიზება, არის საკმაოდ საჩქარო საკითხი. იმედი მაქვს, რომ დღის პირველ ნახევარში ჩვენ ეს საკითხი უნდა გავარკვიოთ და ველი ყველა პოლიტიკური ჯგუფის მონაწილეობას“,- განაცხადა შალვა პაპუაშვილმა.