კორონავირუსით ინფიცირებული ექთნის მეუღლის სინჯს, რომელიც ნუკრიანში ცხოვრობს, ლუგარში დღეს გაგზავნიან

სიღნაღის მუნიციპალიტეტი სოფელ ნუკრიანში თვითიზოლაციაში მყოფი ოთხი მოქალაქის, მათ შორის კორონავირუსით დაინციფირებული თბილისის მე-8 საავადმყოფოს ექთნის მეუღლის სინჯს ლუგარის ლაბორატორიაში დღეს გაგზავნიან. დაავადებათა კონტროლისა და საზოგადოებრივი ჯანმრთელობის ეროვნული ცენტრის კახეთის განყოფილების უფროსმა ნელი ხიზანიშვილმა განაცხადა, რომ არც ერთ მათგანს “კოვიდ 19”-სთვის დამახასიათებელი სიმპტომები არ აღენიშნება.
“თბილისის მე-8 საავადმყოფოს ექთანი 27 აპრილს იმყოფებოდა სოფელ ნუკრიანში. მას კონტაქტი ჰქონდა მხოლოდ მეუღლესთან. კორონავირუსით ინფიცირებულის მეუღლის კონტაქტი კი იკვეთება მხოლოდ სამ მეზობელთან. ოთხივე ნიმუში ლუგარის ლაბორატორიაში დღეს გაიგზავნება”, – განუცხადა “კახეთის ხმას” ნელი ხიზანიშვილმა.
მისივე ინფორმაციით, ტესტირების შედეგები დღეს გვიან ღამე ან ხვალ დილით გახდება ცნობილი.