კახეთში მდებარე სასტუმრო ახაშენი საჭიროების შემთხვევაში კარანტინის რეჟიმში იმუშავებს
სასტუმრო „Akhasheni Wine Resort & spa” ახაშენი, რომელსაც KTW ჯგუფი მართავს, საჭიროების შემთხვევაში, მთავრობას საკუთარი სივრცეების საკარანტინო ზონისათვის გამოყოფას სთავაზობს.
„KTW ჯგუფი სრული პასუხისმგებლობით იზიარებს ქვეყანაში შექმნილ ვითარებას და სურს მაქსიმალური მხარდაჭერა გამოუცხადოს სახელმწიფოს კორონავირუსთან (COVID 19) ბრძოლის მიმართულებით.ჩვენ ვაცნობიერებთ, რომ შესაძლოა პრობლემატური იყოს ქვეყანაში საკარანტინო ზონების მობილიზება. ეს პრობლემა მწვავედ დგას კონკრეტულად კახეთის რეგიონშიც. შესაბამისად, KTW ჯგუფი სრულ მზადყოფნას გამოთქვამს სასტუმრო-კომპლექსი “Akhasheni Wine Resort & spa”, რომელიც გურჯაანის რაიონის სოფელ ახაშენში მდებარეობს, დროებით სრულად დაუთმოს სახელმწიფოს, საკარანტინო ზონად გამოსაყენებლად.
სასტუმრო „Akhasheni Wine Resort & Spa”, მოიცავს 40 სასტუმრო ნომერს, მათ შორის ადაპტირებულ ნომრებს შშმ პირებისთვის. შესაბამისად, ამ ლოკაციაზე კომფორტული საკარანტინო ზონის მოწყობაა შესაძლებელი. KTW ჯგუფი იმედს გამოთქვამს, რომ ჩვენი სახელმწიფო და ზოგადად მსოფლიო მოკლე დროში შეძლებენ ამ გლობალურ პრობლემასთან გამკლავებას და სულ მალე ყველაფერი ჩვეულ რეჟიმს დაუბრუნდება, – აღნიშნულია კომპანიის ოფიციალურ განცახდებაში.
ახაშენი მეორე სასტუმროა, რომელმაც კარანტინის ზონად გამოყოფის გადაწყვეტილება მიიღო. შეგახსენებთ, რომ თელავში მდებარე სასტუმრო „სავანეთში“ ამჟამად 50 პირი გადის კარანტინს.
