სახელმწიფო ბიუჯეტიდან მუნიციპალიტეტებს 250 მილიონი ლარი გამოეყოთ

რეგიონებში განსახორციელებელი პროექტებისათვის 2020 წლის სახელმწიფო ბიუჯეტიდან მუნიციპალიტეტებს 250 მილიონი ლარი გამოეყოთ.

რეგიონული განვითარებისა და ინფრასტრუქტურის სამინისტროს ინფორმაციით, აქედან, ამ ეტაპზე, მუნიციპალიტეტებზე უკვე განაწილდა 128 მილიონი ლარი 262 პროექტის დასაფინანსებლად.

„მომავალ წელს, ფონდის ბიუჯეტის ფარგლებში, ყველაზე მეტი პროექტი საგზაო ინფრასტრუქტურის მიმართულებით განხორციელდება. სულ დაგეგმილია 365 კმ გზის რეაბილიტაცია, რასაც რეგფონდიდან და ადგილობრივი ბიუჯეტიდან ერთობლივად 114 მილიონი ლარზე მეტი მოხმარდება.

რეგიონებში განსახორციელებელი პროექტების ფონდიდან 12 სოფელში დაფინანსდება წყალმომარაგების სისტემების განახლების პროექტები, ასევე სხვადასხვა მუნიციპალიტეტში დაგეგმილია – საბავშვო ბაღების, მრავალბინიანი კორპუსების, კულტურული ობიექტების, სპორტული ინფრასტრუქტურის, გარე განათების, საკანალიზაციო და სანიაღვრე სისტემების რეაბილიტაცია.

რეგფონდიდან მუნიციპალიტეტებში დასაფინანსებელი პროექტების შერჩევის პროცესი გრძელდება. რაც შეეხება მიმდინარე წელს, ფონდიდან 2018 წელთან შედარებით 393 პროექტით მეტი, ჯამში – 1201 პროექტი დაფინანსდა. აქედან 405 პროექტი ჯანდაცვის ინფრასტრუტურის მიმართულებით განხორციელდა. რეგფონდიდან წელს პირველად დაფინანსდა მუნიციპალიტეტებში სტიქიის პრევენციის მცირე სამუშაოები“, – აღნიშნულია უწყების მიერ გავრცელებულ ინფორმაციაში.

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *