სკოლებს და ბაღებს ვალდებულება ექნებათ, რომ დასაქმებული პირების შესახებ პერსონალური ინფორმაცია შსს-ს მიაწოდონ

სკოლებს, ბაღებს და სპეციალიზებულ დაწესებულებებს ვალდებულება ექნებათ, რომ მასში დასაქმებული პირების შესახებ პერსონალური ინფორმაცია შინაგან საქმეთა სამინისტროს მიაწოდონ.

ამ მიმართულებით პარლამენტი იხილავს „სქესობრივი თავისუფლებისა და ხელშეუხებლობის წინააღმდეგ მიმართულ დანაშაულთან ბრძოლის შესახებ“ კანონპორექტს და მისგან გამომდინარე საკანონმდებლო ცვლილებათა პაკეტს.

აღსანიშნავია, რომ პირველი მოსმენით დამტკიცებულ საკანონმდებლო ცვლილებათა პაკეტში ჩანაწერი, დასაქმებული პირების შესახებ შსს-სთვის ინფორმაციის გადაცემის ვალდებულების თაობაზე, არ ყოფილა. კანონპროექტის მომხსენებელმა, შს მინისტრის მოადგილე ნინო ცაციაშვილმა პლენარულ სხდომაზე განხილვისას განმარტა, რომ ვახტან გომელურის უწყებამ ამ ცვლილებით კომიტეტზე გამოთქმული შენიშვნები გაითვალისწინა.

,,საკანონმდებლო ცვლილების მიხედვით, სკოლაში, სპეციალიზებულ დაწესებულებაში და ასევე, სკოლამდელი აღზრდის დაწესებულებაში არ შეიძლება დასაქმებული იყოს სქესობრივი თავისუფლებისა და ხელშეუხებლობის წინააღმდეგ მიმართული დანაშაულის ჩადენისთვის ნასამართლევი პირი, მიუხედავად ნასამართლობის მოხსნისა ან გაქარწყლებისა.

ცვლილებების მიხედვით, ამ კანონის ამოქმედებიდან 3 თვის ვადაში დაწესებულება ვალდებული იქნება შსს-ს ელექტრონულად მიაწოდოს დაწესებულებაში დასაქმებული პირის პერსონალური მონაცემები.

კერძოდ, მისი სახელი, გვარი და პირადი ნომერი, დასაქმების ადგილი და თანამდებობა. შინაგან საქმეთა სამინისტრო 3 თვის ვადაში ამოწმებს ამ პირთა ნასამართლობის შესახებ ინფორმაციას.

თუ გამოვლინდა, რომ დაწესებულებაში დასაქმებული პირი ნასამართლევია სქესობრივი თავისუფლებისა და ხელშეუხებლობის წინააღმდეგ მიმართული დანაშაულის ჩადენაში, შინაგან საქმეთა სამინისტრო აღნიშნულის თაობაზე აცნობებს დაწესებულებას, რომელიც ვალდებული იქნება, დასაქმებულ პირთან შეწყვიტოს შრომითი ურთიერთობა საქართველოს კანონმდებლობით დადგენილი წესის შესაბამისად”,-განაცხადა ნინო ცაციაშვილმა.

საკანონმდებლო ცვლილებათა პაკეტის ინიციატორი შინაგან საქმეთა სამინისტროა.

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *