პარტიების დარბეული ოფისები კახეთში
საპარლამენტო არჩევნებამდე დაახლოებით ერთი თვე რჩება და პოლიტიკური დუღილის ტემპერატურა დღითიდღე მატულობს. ოპოზიცია აღნიშნულ ფაქტებს პოლიტიკურ დევნად აფასებს და მმართველ პარტიას უკავშირებს. მესამე სექტორი კი საგამოძიებო ორგანოსგან მყისეიერ რეაგირებას ითხოვს. ოპოზიციური პოლიტიკური პარტიების ოფიების დაზიანება წინასაარჩევნო პერიოდის განუყოფელ ნაწილად იქცა. თუ 2014 წლის ადგილობრივი თვითმმართველობის არჩევნების წინ და შემდგომ პერიოდში ძირითადი სამიზნე ყოფილი სახელისუფლებო პარტიის ოფისები იყო, ამჟამად პოლიტიკური დევნის ობიექტი ნაციონალურ მოძრაობასთან ერთად პაატა ბურჭულაძის პარტიაც გახდა.
მიმდინარე წლის 25 აგვისტოს პოლიტიკური პლატფორმა “პაატა ბურჭულაძე–სახელმწიფო ხალხისთვის“ გურჯაანისა და წნორის რაიონული ოფისები დააზიანეს. დაუდგენელმა პირებმა შენობების კედლები და სააგიტაციო ბანერები ცისფერი წარწერებით,,41“ და ,,41+პაატა“ შეღებეს.
პარტიის გურჯაანის რაიონული ორგანიზაციის თავმჯდომარე გია ხაზიური აღნიშნული ფაქტს პოლიტიკურ ანგარიშსწორებად აფასებს და მომხდარს ყოფილ და ამჟამინდელ სახელისუფლებო პარტიას უკავშირებს.
„ბოლო პერიოდში ორი პოლიტიკური ძალა “ქართული ოცნება“ და ,,ნაციონალური მოძრაობა“ ისტერიულად, ყველანაირი მეთოდით გვებრძვის. ერთი გვეუბნება, რომ ერთის სატელიტი ვართ, მეორე გვეუბნება, რომ მეორის სატელიტი ვართ. ერთმანეთს თავი დაანებეს და ჩვენზეა გადმოტანილი აქცენტი, რადგან იციან ჩვენი ძალა“, – აცხადებს ხაზიური.
ნაციონალური მოძრაობა კი 2016 წლის არჩევნების წინა პერიოდშიც მოხვდა პოლიტიკურ სამიზნეში. პარტიის დედოფლისწყაროს რაიონული ოფისი კი 11 აგვისტოს გვიან ღამით დაარბიეს. ყოფილი სახელისუფლებო პარტიის სიღნაღი–დედოფლისწყაროს მაჟორიტარი დეპუტატობის კანდიდატი ლევან ბეჟაშვილი ამბობს, რომ ოფისს ღამით საღებავები და ქვები ესროლეს. ბეჟაშვილი მომხდარზე პასუხისმგებლობას საქართველოს პრემიერჶმინისტრს აკისრებს.
„როგორც ჩანს, პრემიერმინისტრი გიორგი კვირიკაშვილი წარმატებით აგრძელებს ირაკლი ღარიბაშვილის ხაზს“, – ამბობს ბეჟაშვილი.
თელავის თემის საკრებულოს თანამშრომელმა ლევან კოჭლოშვილმა კი ორი კვირის წინ ქალაქის ცენტრში პოლიტიკური პერფომანსი დადგა და ნაციონალური მოძრაობის თელავიჶყვარლის მაჟორიტარი დეპუტატობის კანდიდატის ავტომანქანა ცოცხით შეამკო. კოჭლოშვილმა ხაზგასმით აღნიშნა, რომ პროტესტის ამ ფორმას შვებულებაში ყოფნის დროს მიმართა.
„ვარ საჯარო მოხელე. აღვნიშნავ იმას, რომ წინა დღეს ვიყავი შვებულებაში, როცა ეს ფაქტი მოხდა“, – ამბობს კოჭლოშვილი.
თელავის მუნიციპალიტეტის გამგებელმა კოჭლოშვილს აღნიშნული ქმედება მოუწონა. ალექსანდრე შათირიშვილი ფიქრობს, რომ ყველამ ნაციონალურ მოძრაობას დროდადრო უნდა შეახსენოს 9 წლიანი მმართველობა. ყოფილ მმართველ პარტიაში მიზანმიმართულ პროვოკაციაზე საუბრობენ და საჯარო მოხელის ქმედებაში „ქართული ოცნების“ თელავიჶყვარლის მაჟორიტარი დეპუტატობის კანდიდატის კავშირს ხედავენ.
მესამე სექტორი კი მომხდარი ფაქტების სწრაფ გამოძიებას ითხოვს და პროკურატურას მყისიერი რეაგირებისკენ მოუწოდებს. „საერთაშორისო გამჭვირვალობა საქართველოს“ კახეთის რეგიონალური კოორდინატორი ზურაბ მირზიკაშვილი მიიჩნევს, რომ თუ პროკურატურა ამ ინციდენტებს დროულად არ გამოიძიებს, მსგავსი ქმედედბებს ჩადენას წაახალისებს.
„ძალიან მნიშვნელოვანია, რომ ეს ფაქტები პროკურატურამ ძალიან სწრაფად გამოიძიოს. ამ ფაქტების გამოძიებას არ სჭირდება დიდი რესურსი. საგამოძიებო ორგანომ შესაბამისი ღონისიებები უნდა გაატაროს, რათა სხვა ადამიანებს არ მიეცეთ ამგვარი ქმედებების ჩადენის პრეცედენტი. ასეთი ფაქტები ამწვავებს წინასაარჩევნო პერიოდს“, – აღნიშნავს მირზიკაშვილი.
ოპოზიცია კი არჩევნების მოახლოებასთან ერთად მმართველი გუნდის მხრიდან პოლიტიკური დევნის ფაქტების გახშირებას პროგნოზირებს და ირწმუნება, რომ ხელისუფლების მიერ წახალისებული ძალადობის ფაქტები 8 ოქტომბერს დასრულდება.
სტატია მომზადებულია პროექტის ადგილობრივი მედია ინფორმირებული ახალგაზრდა ამომრჩეველისათვის. ფარგლებში, რომელიც ხორციელდება „მედია ცენტრი კახეთის“ მიერ.
