ლევან დავითაშვილი აგრარული ფაკულტეტის ახალი სასწავლო კორპუსის გახსნას დაესწრო
დამსწრე საზოგადოებას მისასალმებელი სიტყვით მიმართეს განათლებისა და მეცნიერების მინისტრმა ალექსანდრე ჯეჯელავამ, სოფლის მეურნეობის მინისტრმა ლევან დავითაშვილმა, ტექნიკური უნივერსიტეტის რექტორმა არჩილ ფრანგიშვილმა, სოფლის მეურნეობის მეცნიერებათა აკადემიის პრეზიდენტმა გურამ ალექსიძემ, კავკასიის უნივერსიტეტის პრეზიდენტმა კახა შენგელიამ.
როგორც სოფლის მეურნეობის მინისტრმა ღონისძიებაზე სიტყვით გამოსვლისას აღნიშნა, იმისათვის, რომ ქვეყანაში კონკურენტუნარიანი აგრარული დარგის განვითარება მოხდეს, აუცილებელია სათანადო ცოდნა და მეცნიერული კვლევები.
„მადლობა მინდა გადავუხადო ყველას, ვინც საკუთარი წვლილი შეიტანა ჩვენი მომავალი თაობისთვის ისეთი სასწავლო დაწესებულებით უზრუნველყოფის საქმეში, როგორიც აგრარული მეცნიერებებისა და ბიოსისტემების ინჟინერინგის ფაკულტეტია. ჩვენ ვიცით, რომ ახალგაზრდების ინტერესი სოფლის მეურნეობის დარგის მიმართ გაზრდილია, ჩვენ ამ ახალგაზრდებს მაქსიმალურად უნდა შევუწყოთ ხელი სრულფასოვანი ცოდნა მიიღონ. დღეს სწორედ ისეთი სასწავლო დაწესებულება გაიხსნა, რომელიც ახალგაზრდებს ყველა პირობას უქმნის პროფესიონალებად ჩამოყალიბდნენ. მათ ეძლევათ საშუალება, ღირსეული მეცნიერებისა და პროფესორ-მასწავლებლების ხელმძღვანელობით დაეუფლონ ცოდნას“, – განაცხადა ლევან დავითაშვილმა.