მოახლოებულ შუალედურ არჩევნებზე ახალგაზრდების ინფორმირების დონე დაბალია
საგარეჯოელი ახალგაზრდები ვერც მაჟორიტარი დეპუტატობის კანდიდატებს იცნობენ და, საერთოდ, შუალედურ არჩევნებში მონაწილეობის მიღება მათ გეგმებში არ შედის. ,,კახეთის ხმა“ დაინტერესდა, იციან თუ არა, რას ნიშნავს შუალედური არჩევნები, რა შემთხვევაში ინიშნება და, ასევე, ფლობენ თუ არა ინფორმაციას საკუთარი უფლებების შესახებ.
აღმოჩნდა, რომ ახალგაზრდების ნაწილი ამ საკითხებზე ინფორმაციას საერთოდ არ ფლობს, სხვა ნაწილს კი მიაჩნია, რომ არჩევნებში მონაწილეობის მიღება მათი მოქალაქეობრივი ვალდებულებაა.
25 წლის ბექა, რომელიც ქალაქ საგარეჯოში ცხოვრობს, კამერასთან საუბარს ერიდება. პირად საუბრებში კი აცხადებს, რომ მონაწილეობა დღემდე არცერთ არჩევნებში არ მიუღია, რასაც საკითხის მიმართ უინტერესობით ხსნის. ,,არ ვიღებ არჩევნებში მონაწილეობას, რადგან ვფიქრობ, რომ ფარსია. მიმაჩნია, რომ ჩემი ხმა არაფერს შეცვლის, რადგან ბევრისგან მომისმენია მისი გაყალბების შესახებ. ამიტომ არის, რომ არ მაინტერესებს ეს საკითხი. ასე ფიქრობს ჩემი თანატოლების დიდი ნაწილი. რისთვის წავიდე არჩევნებზე, როცა წინსაწარ იციან, ვინ გაიმარჯვებს. ჩემი საარჩევნო უფლება მაშინ დამაინტერესებს, როცა ქვეყანაში ეს საკითხი მოგვარდება და მომავალ თაობას თვალებში ნაცარს აღარ შეგვაყრიან“.
სხვაგვარად ფიქრობს საგარეჯოელი ახალგაზრდების სხვა ნაწილი. 17 წლის თამარ არაბულს მიაჩნია, რომ საქართველოში საარჩევნო კულტურა ნაკლებად არის განვითარებული, ამიტომ მოქალაქის როლს კარგად ვერ აცნობიერებენ.
,,ჩემ გარშემო ბევრი ადამიანი არ მიდის შუალედურ არჩევნებზე. ვთვლი, რომ მათ უნდა ესმოდეთ, რამდენად მნიშვნელოვანია საკუთარი არჩევანის დაფიქსირება. მე მაინტერესებს ეს საკითხი, ამიტომ საარჩევნო თემატიკაზე ბევრს ვკითხულობ და საინფორმაციო შეხვედრებსაც ვესწრები. ვაცნობიერებ ჩემს როლს და ვსწავლობ ჩემს უფლებებს, რათა მომავალში ვიყო ინფორმირებული ამომრჩეველი.“
რაც შეეხება, საგარეჯოს მუნიციპალიტეტში, იორმუღანლოს თემში მცხოვრებ ახალგაზრდებს, მათი დიდი უმრავლესობა არ ფლობს ინფორმაციას საარჩევნო თემებზე, მათ შორის, მოახლოებულ შუალედურ არჩევნებზე.
იასინ აბაზოვს 18 წელი ახლახანს შეუსრულდა, შესაბამისად, უფლებამოსილია, მონაწილეობა მიიღოს შუალედური არჩევნებში და საკუთარი არჩევანი დააფიქსორის, თუმცა მისთვის ეს საკითხი უინტერესო აღმოჩნდა.
სხვაგვარად ფიქრობს 16 წლის იორმუღანლოელი ახალგაზრდა. ზოჰრად მუსამბალიევისთვის არჩევნებში მონაწილეობის მიღება სავალდებულოა, მოქალაქემ დამოუკიდებლად უნდა მიიღოს გადაწყვეტილება, ვინ აირჩიოს.
,,საქართველოს ყველა მოქალაქემ უნდა მიიღოს არჩევნებში მონაწილეობა, ეს აუცილებელია. მივესალმები არჩევნების შესახებ შეხვედრების ჩატარებას, რომ ყველამ გავიაზროთ, რა ფუნქცია გვაკისრია და ვიცოდეთ ჩვენი უფლებების შესახებ“.
ლამბალოს საჯარო სკოლის პედაგოგ რუსუდან დუჩიძეს მიაჩნია, რომ ახალგაზრდებისთვის საინფორმაციო შეხვედრების ჩატარება და მათი ცნობიერების ამაღლება საარჩევნო საკითხებზე მნიშვნელოვანია შემდგომი განვითარებისა და აქტიურობისთვის.
არასამთავრობო ორგანიზაცია ,,სამართლიანი არჩევნების“ იურისტი ნინო ხითარიშვილი ,,კახეთის ხმასთან“ საუბარში განმარტავს, რომ ორგანიზაციის ერთჶერთ მთავარ მიმართულებას სამოქალაქო ცნობიერების ამაღლება წარმოადგენს, ისინი მუდმივად თანამშრომლობენ ახალგაზრდებთან პროექტების, აქტივობებისა და სტაჟირებების გზით.
,,ახალგაზრდების ინფორმირების კუთხით არაერთი აქტივობა განვახორციელეთ, ვინაიდან მათი აქტიურობა და ინფორმირებული არჩევანი მნიშვნელოვანია ქვეყნის დემოკრატიული განვითარებისთვის. ორგანიზაციამ პროექტით – „მე ხმას ვაძლევ პირველად“ 20062008 წლის ჩათვლით 280 შეხვედრა ჩატარდა იმ ახალგაზრდებთან, რომლებიც პირველად იღებდნენ მონაწილეობას არჩევნებში.
ჩვენ ინოვაციური გზით ვცადეთ მოქალაქეთა ინფორმირება და ჩართვა საარჩევნო საკითხებში. კონკრეტულად კი, 2008 წელს განახორციელა პროექტი „ავტობუსის ტურები“, როდესაც ორგანიზაციის თანამშრომლებმა და მოხალისეებმა მოაწყვეს ტურები საქართველოს რეგიონებში და მოსახლეობას აწვდიდნენ ინფორმაციას საარჩევნო პროცედურების შესახებ, დაურიგეს ბუკლეტები და მოეწყო არჩევნების დღის სიმულაცია ადგილობრივი მოსახლეობის მონაწილეობით“.
ნინო ხითარიშვილის განმარტებით, ორგანიზაციის მიერ შექმნილი არჩევნების პორტალზე (www.electionsportal.ge) განთავსებულია ინფორმაცია საარჩევნო საკითხებთან დაკავშირებით, მათ შორის, დარღვევებზე, საარჩევნო რეფორმებზე. ,,მიგვაჩნია, რომ აუცილებელია, მუდმივად განხორციელდეს სხვადასხვა პროექტები და აქტივობები ახალგაზრდებისთვის, რათა მათ ინფორმაცია ჰქონდეთ არჩევნების შესახებ, გამოიყენონ საკუთარი საარჩევნო უფლება, ვინაიდან ყველა ამომრჩევლის ხმა მნიშვნელოვანია“.