,,როგორც დედინაცვალი უყურებს ბავშვს, ისე უყურებენ ამ სოფელს” – წინასაარჩევნო კამპანია საგარეჯოში
იორმუღანლოში მცხოვრები მოსახლეობის ნაწილი აცხადებს, რომ კანდიდატებს არ იცნობენ, არ მოუსმენიათ კონკრეტული დაპირებები, რის გამოც რომელიმეს ხმას მისცემენ.
,,სოფლის ბირჟაზე თქვეს, რომ რამდენიმე დღის წინ ყოფილან მოსულები, მაგრამ მე არ მინახავს, გარეთ არ ვიყავი, აქვე ვცხოვრობ, არც არავის არ დაუძახია, რომ მომესმინა რას იტყოდნენ. თუ მოვიდნენ, ხალხს ხომ უნდა ენახა ვინ იყვნენ, არც სახელი ვიცი და არც გვარი, სახეზეც ვერ ვიცნობ ვერცერთს. ამბობენ, ორივე ქალიაო“, – გვიყვება იუსუფ ყურბანოვი.
ლამბალოს მცხოვრები ახმედ ახმედოვი სწორედ იმ დროს იმყოფებოდა სოფლის ბირჟაზე, როდესაც ერთჶერთი კანდიდატი მათ სოფელში მივიდა და მოსახლეობას გაესაუბრა. მიუხედავად ამისა, ახმედოვი ვერ იხსნებს ვერც სახელსა და ვერც გვარს. ჩემი ბევრი მცდელობის მიუხედავად, აღეწერა კანდიდატი ფიზიკურად, ფუჭი აღმოჩნდა. ახმედოვმა გვითხრა, რომ იგი არჩევნებზე არ მიდის და არც კომენტარი არ სურს.
,,როცა არჩევნებია, მაშინ ვახსოვართ ყველას, მერე არავინ აქ არ მოდის, ვავიწყდებით. გვითხრეს, რომ მე მომეცით ხმაო, დაპირებით არაფერს არ დაგვპირდა, მხოლოდ ის თქვა, რომ ყველაფერი კარგად იქნებაო. მე მაინტერესებს, როგორ ვიცხოვრო. ჩვენს სოფელში ბევრი პრობლემებია გადასაჭრელი. თუ მიწას მომცემენ, წავალ, თუ არადა, რისთვის წავიდე. ჩვენ დიდი პრობლემა გვაქვს საძოვრებთან დაკავშირებით, სად წავიყვანო საქონელი?“
სოფლის პრობლემებზე ამახვილებს ყურადღებას იორმუღანლოს მცხოვრები სამან ჯალილოვიც. ,,კახეთის ხმასთან“ საუბარში აცხადებს, რომ იგი საქონელს ვერ ყიდის, მოსაგვარებელია როგორც სოფლის საძოვრების, ასევე, წყლისა და შიდა გზების საკითხები.
,,ამდენი პრობლემა აქვს სოფელს, ცხვარს ვერ ვყიდით. ჩემ საქონელს ფასი არ აქვს. შენ წახვიდოდი არჩევნებზე და მისცემდი ხმას? სომხეთის ცხვარი გადის აქედან არაბეთში, ჩვენი კიდევ აქ რჩება გაუყიდავი. რომ წავიდე არჩევნებზე, მომიგვარებენ ამ პრობლემებს, რისთვის წავიდე, არ მივდივარ“!
საგარეჯოს მუნიციპალტეტის სოფლების ბადიაურისა და მზისგულის მცხოვრებლებიც სოფელში არსებული პრობლემების მოგვარებას ითხოვენ. მათი თქმით, ისინი არჩევნებს აღარ ენდობიან, რადგან, რასაც დაჰპირდნენ, არ შეასრულეს. საგარეჯოში მიმდინარე წინასაარჩევნო კამპანიას ,,კახეთის ხმასთან“ აფასებენ მაჟორიტარობის კანდიდატი ქალბატონები. კოალიცია ,,ქართული ოცნების“ წარმომადგენელი თამარ ხიდაშელი ,,კახეთის ხმასთან“ ინტერვიუში განმარტავს, რომ მუნიციპალიტეტში წინასაარჩევნო კამპანია სამართლიან და თანაბარ პირობებში მიმდინარეობს.
,,წინასაარჩევნო კამპანია დაწყებულია და კონკურენცია არსებობს, თუმცა დარწმუნებული ვარ, რომ გავიმარჯვებ. ქართულენოვანი სოფლები მოვიარე, ახლა აქტიური შეხვედრები გვექნება აზერბაიჯანულ თემში. მოვაგროვე ის ძირითადი პრობლემები, რაც მოსახლეობას აწუხებს. წინასაარჩევნო გარემო არის თავისუფალი, ყველა რეგისტრირებულ კანდიდატს აქვს თავისუფალ გარემოში წინასაარჩევნო კამპანიის ჩატარების უფლება, მათ ხელი არ ეშლებათ.“
მოსახლეობასთან აქტიურ შეხვედრებს მართავს მაჟრიტარობის კანდიდატი პარტია „საქართველოს პატრიოტთა ალიანსიდან“ ირმა ინაშვილიც. იგი ისევე დარწმუნებულია საკუთარ გამარჯვებაში, როგორც სახელისუფლებო კანდიდატი. ინაშვილის განცხადებით, იგი მოსახლეობას არ უყურებს, როგორც ხმებს. მისთვის მთავარი ხალხთან მჭიდრო ურთიერთობაა:
,,ჩემი ოპონენტის მხარდასაჭერად საგარეჯოში, სოფლებში ჩამოდიან მაღალი თანამდებობის პირები, მინისტრები, მოადგილეები და სხვა მაღალჩინოსნები, რომლებიც მონაწილეობას იღებენ წინასაარჩევნო კამპანიაში, მაგრამ მე ეს არ მაშინებს. მაინტერესებს არის ეს თუ არა ადმინისტრაციული რესურსის ირიბი გამოყენება, მე პრეტენზია მაქვს იმ საარჩევნო კოდექსთან, რომელიც მსგავსი კანონებით არის სავსე. მე ვხვდები საგარეჯოელებს, თითქმის ყველა სოფელი მაქვს მოვლილი ფეხით, ზუსტად ვიცი, რა პრობლემებია და პარლამენტიდან ვიბრძოლებ საგარეჯოელების უფლებების დასაცავად“.
წინასაარჩევნო პერიოდის მნიშვნელობაზე ამახვილებს ყურადღებას საქართველოს ახალგაზრდა იურისტთა ასოციაციის თელავის ოფისის ხელძღვანელი მარეხ მგალობლიშვილი. მისი განმარტებით, უპრიანი იქნება, თუ გამოყენებული იქნება უწყებათაშორისი კომისიის მიერ შემუშავებული რეკომენდაციების გათვალისწინება, რათა თავიდან იქნეს აცილებული საარჩევნო კანონმდებლობის დარღვევა საჯარო მოსამსახურეებისა და ადმინისტრაციული ორგანოების მხრიდან.
,,ეს არის კანონით გარანტირებული ინსტიტუტი, რომელიც ყოველი არჩევნების დროს აკონტროლებს და ზედამხედველობას უწევს საჯარო დაწესებულებებში მომუშავე პირების მხრიდან საარჩევნო კანონმდებლობით გათვალისწინებული რეგულაციების შესრულებას. მათ სწორი რეკომენდაციები შეიმუშავეს და მიუთითეს, რომ დღეს მოქმედი საარჩევნო კანონდებლობა არ არის სრულყოფილი, რომელიც იძლევა სრულ განმარტებას წინასაარჩევნო აგიტაციასა და პროპაგანდის, მასში მონაწილე პირების უფლებამოსილებაზე, ამიტომ საჭირო გახდა დამატებითი რეკომენდაციების შემუშავება, რომელმაც შეავსო ის ბუნდოვანი მუხლები, რომელიც ჩვენ გვაქვს ამ პერიოდთან დაკავშირებით. ეს ეხება, მაგალითად, წინასაარჩევნო კამპანიაში, ვის აქვს მონაწილეობის უფლება. თუ რომელიმე კანდიდატს გააჩნია კომპრომატები, რომ ოპონენტი არღვევს კანონს და მიიჩნევს, რომ არათანაბარ გარემოში უხდება წინასაარჩევნო კამპანია, შეუძლია, მიმართოს ამ კომისიას, რომელიც მკაცრად აკონტროლებს ასეთ ფაქტებს. თუ ვთქვათ, მოხდა იდენტიფიცირება, მაგალითად, ფოტოების მიხედვით, ასეთ შემთხვევაში არსებობს მექანიზმი, ადმინისტრაციული სანქციების სახით აგონ პასუხი საარჩევნო კოდექსის მიხედვით“.
საარჩევნო კოდექსის მიხედვით, წინასაარჩევნო აგიტაციის გაწევისა და აგიტაციაში მონაწილეობის უფლება აქვს ნებისმიერ პირს, გარდა: საარჩევნო კომისიის წევრისა, მოსამართლისა, საქართველოს შინაგან საქმეთა და თავდაცვის სამინისტროების, პროკურატურის, დაზვერვის სამსახურისა და სახელმწიფო დაცვის სპეციალური სამსახურის საჯარო მოხელეებისა, საქართველოს კონტროლის პალატის თავმჯდომარისა, საქართველოს სახალხო დამცველისა, უცხო ქვეყნის მოქალაქისა და ორგანიზაციისა, საქველმოქმედო და რელიგიური ორგანიზაციებისა, სახელმწიფო და ადგილობრივი თვითმმართველობის ორგანოების საჯარო მოხელეებისა, როდესაც ისინი უშუალოდ ასრულებენ სამსახურებრივ ფუნქციებს, საქართველოს კომუნიკაციების ეროვნული კომისიისა და საქართველოს ენერგეტიკისა და წყალმომარაგების მარეგულირებელი ეროვნული კომისიის წევრებისა.