პრემიერ მინისტრი სოფელ ნუკრიანში შეხვედრებს მართავს

პრემიერ-მინისტრს ბოდბელმა ეპისკოპოსმა, სრულიად საქართველოს კათოლიკოს-პატრიარქის ქორეპისკოპოსმა, მეუფე იაკობმა უმასპინძლა. 13:30 საათისთვის, ირაკლი ღარიბაშვილმა სოფელ ნუკრიანში „დელტას“ სეტყვის საწინააღმდეგო რადარისა და საცეცხლე დანადგარები მოინახულა. ახალი დანადგარების მეშვეობით კახეთის რეგიონში სასოფლო-სამეურნეო სავარგულებში სეტყვისაგან მიყენებული ზარალი 80-90 პროცენტით შემცირდება. 
პრემიერ-მინისტრის პრესსამსახურის ინფორმაციით, სეტყვის საწინააღმდეგო ავტომატიზებული სისტემის ღირებულება 14 მილიონ ლარს აღემატება:

,,პროექტის ძირითადი ნაწილი უკვე შესრულებულია ნუკრიანში, ჭოტორის მთაზე დასრულდა რადარის მშენებლობა, რომლითაც იმართება 83 საცეცხლე წერტილი. ეს არის უპრეცედენტო პროექტი, რომელიც იყო ჩვენი ხელისუფლების დაპირება. წლების განმავლობაში, კახეთის რეგიონი ზარალდებოდა უამინდობის გამო და ეს იყო გადაუჭრელი პრობლემა. გლეხს წყალში ეყრებოდა მისი მთელი წლის შრომა. ასევე არ ხდებოდა მოსავლის დაზღვევა. ჩვენ ამ მოწყობილობისთვის უკვე დავხარჯეთ 14 მილიონი ლარი. მისასალმებელია, რომ სსიპ “დელტა” ამ უაღრესად საჭირო და აუცილებელ პროექტს ახორციელებს და დიდი მადლობა ყველას ამ მნიშვნელოვანი საქმისთვის. როგორც სპეციალისტები აცხადებენ, დაახლოებით 80-90 პროცენტით შემცირდება ზარალი. ასევე დავიწყეთ მოსავლის დაზღვევის პროგრამა, რაც არის დიდი შეღავათი ფერმერებისთვის,”–

განაცხადა ირაკლი ღარიბაშვილმა ჟურნალისტებთან საუბრისას. ამ წუთებში, პრემიერი კახელ ბიზნესმენებს ხვდება. საუბრის თემა კახეთის ეკონომიკური პოტენციალის საკითხების მიმოხილვაა. სოფელ ნუკრიანში პრემიერ-მინისტრი მთავრობის წევრებთან და კახეთის გუბერნატორთან ერთად იმყოფება.