გურჯაანში, სოფელ ვეჯინში DoubleTree by Hilton-ის სასტუმრო გაიხსნება
გურჯაანის მუნიციპალიტეტის სოფელ ვეჯინში DoubleTree by Hilton ბრენდის სასტუმრო გაიხსნება.
სასტუმრო პროექტის მმართველი კომპანია „GVG +“-ის დირექტორმა მალხაზ ბიწაძეს ინფორმაციით, პროექტი 12 ჰა მიწის ფართობზე, სასტუმროსთან ერთად 67 ვილის მშენებლობას მოიცავს და მისი საინვესტიციო ღირებულება სრულად 50 მლნ ლარია. სასტუმროს პროექტის ღირებულება კი 25 მილიონი ლარი იქნება. BM.GE-სთან კომპანიის დირექტორი აღნიშნავს, რომ გურჯაანში პროექტი სახელმწიფო სააგენტო „აწარმოე საქართველოს“ ხელშეწყობით შენდება და თანადაფინანსების მოცულობა 6 მლნ ლარს შეადგენს.
„გურჯაანის მუნიციპალიტეტში, სოფელ ვეჯინში ყოფილი სანატორიუმის ტერიტორიას კომპანია GVG + დიდი ხანია ფლობს. განხორციელდა მოლაპარაკებები Hilton-თან და Double Tree-ს მაღალი კლასის ბრენდის ქვეშ 100-ნომრიანი სასტუმრო შენდება. ეს იქნება საერთაშორისო ბრენდის ქვეშ მოქმედი სასტუმრო. ამასთან, პროექტი სასტუმროს უკან დიდ ტერიტორიაზე 67 ვილის მშენებლობასაც მოიცავს. საუბარი იმაზე, იქნება თუ არა ვილების Hilton-ის მენეჯმენტის ქვეშ, არ არის, თუმცა პირველი ხაზის ვილები სასტუმროს გაშვების დროს მზად უნდა იყოს. სასტუმროს გახსნა 2025 წლის შემოდგომის სეზონისთვის იგეგმება, ხოლო ვილების პირველ რიგში 9 კოტეჯის მშენებლობა და მათი მოწყობა სასტუმროს გახსნის დღისათვის დასრულებული იქნება“,.
DoubleTree by Hilton-ის ბრენდის 100-ოთახიანი სასტუმრო პროექტი სპა-ცენტრის მოწყობას მოიცავს, რაც ღია და დახურული აუზის, მშრალი დ სველი საუნების, ასევე სამასაჟე სივრცის მოწყობას გულისხმობს, სასტუმროში იქნება ასევე რესტორანი და საკონფერენციო სივრცეები. სასტუმროდან კი ალაზნის ველის ხედები გაიშლება. „GVG +“ – ის დირექტორი ამბობს, რომ ამოქმედების შემდეგ სასტუმრო 100 სამუშაო ადგილს შექმნის.
მისივე ინფორმაციით, დღეისთვის სასტუმროს ნაწილში რკინა-ბეტონის კარკასის მშენებლობა დასრულებულია და გარე კედლების შევსების სამუშაოები მიმდინარეობს. სასტუმრო არქიტექტურულ პროექტი კომპანია Studio 9-ს ეკუთვნის, ხოლო შიდა ინტერიერის და ოთახების დიზაინზე იტალიელი დიზაინერები მუშაობენ.
რაც შეეხება პროექტის მეორე ნაწილს, ის 7 ჰა-ზე მცირე ზომის დასახლების მოწყობას გულისხმობს, სადაც 67 დახვეწილი დიზაინის ვილი განთავსდება, რომლებსაც საცურაო აუზი ექნებათ. დასახლება ერთიანის დაცვის და სხვადასხვა მომსახურებით იქნება უზრუნველყოფილი, რომელსაც მართვას ადმინისტრაცია გაუწევს. აღნიშნული ვილები გასაყიდად იქნება გამიზნული.
ვეჯინში სასტუმრო და ვილების ₾50 მილიონიანი პროექტის განმახორციელებელი კომპანია GVG+ 2012 წელს დაფუძნდა და მის 100%-იან წილს კომპანია „მაემანის“ მართავს. თავის მხრივ მშობელი კომპანიის წილებს აკაკი ახვლედიანი (58%), გიორგი გელაშვილი (25%) და დავით ქარსელაძე (17%) ფლობენ. „მაემანის“ დირექტორი კი გიორგი გელაშვილია.
DoubleTree by Hilton ამერიკული სასტუმროების ქსელია, რომელსაც Hilton Worldwide მართავს. სტუმარმასპინძლობის სექტორში პროექტების მართვის 55-წლიანი გამოცდილებით, დღეისთვის ბრენდი მსოფლიოში 580-ზე მეტ სასტუმროსა და კურორტს მართავს.
