კახეთში წყალსაცავის აშენება იგეგმება

სოფლის მეურნეობის მინისტრობის კანდიდატის ოთარ შამუგიას ინფორმაციით, სახელმწიფო კახეთში წყალსაცავის მშენებლობაზე მუშაობს, რომელიც ფერმერებისთვის წყალუზრუნველყოფის პრობლემას გადაჭრის.

როგორც შამუგიამ პარლამენტში 5 კომიტეტის გაერთიანებულ სხდომაზე დეპუტატების კითხვების საპასუხოდ განმარტა წყალსაცავის პროექტი, რომელიც ჯერ დაწყებით ეტაპზეა ილტოს პროექტითაა და ცნობილი და ის კახეთის რეგიონისთვის ძალიან მნიშვნელოვანია.

„ჩვენ ყოველწლიურად სარწყავი წყლის დეფიციტს ვხედავთ, აქედან გამომდინარე ფერმერებს წყალუზრუნველყოფის და თავისი ფართობების მორწყვის პრობლემები ექმნებათ. შესაბამისად მნიშვნელოვანია, ჩვენ ავაშენოთ წყალსაცავი, სადაც წინასწარი გათვლებით, 80 მლნ კუბური მეტრის წყალსაცავზე ვსაუბრობთ, თუმცა ეს ტექნიკურ-ეკონომიკურმა კვლევამ უნდა განსაზღვროს. ჩვენ ამ საკითხზე მომუშავე ექსპერტები დავიქირავეთ და ტექნიკური დავალება მზად არის, რომელიც მსოფლიო ბანკის ექსპერტებს გადაეცა. ალბათ, მომავალ კვირას მსოფლიო ბანკის სტრუქტურებთან შეთანხმებით ამ საკითხზე ტენდერი გამოცხადდება. ტენდერში გამარჯვებული კომპანია დეტალურ ტექნიკურ დასაბუთებას მოამზადებს, რომლის შემდეგაც კონკრეტული მონაცემები გვექნება, როგორ უნდა გავაგრძელოთ ეს პროექტი და როგორი იქნება მისი განხორციელების მიზანშეწონილობა – 80 მლნ კუბური მეტრი იქნება თუ სხვა მასშტაბია იქ საჭირო. ტექნიკურ-ეკონომიკური დასაბუთების შემდეგ გადავდგამთ შემდგომ ნაბიჯებს“, – განაცხადა ოთარ შამუგიამ.