შესაძლოა რეფერენტული ფასი ურეცეპტო მედიკამენტებზეც გავრცელდეს

წლის ბოლომდე რეფერენტული ფასი ურეცეპტო მედიკამენტებზეც გავრცელდება. ამის შესახებ ჯანდაცვის სამინისტროს სტრატეგიული განვითარებისა და ანალიტიკის დეპარტამენტის უფროსმა ლელა სულაბერიძემ განაცხადა.

მისივე თქმით, ამ ეტაპზე რეფერენტულ ფასები ეხება ძირითადად რეცეპტორულ მედიკამენტებს, თუმცა ამ წლის ბოლომდე ეს მიდგომა გავრცელდება არა რეცეპტორულ (ურეცეპტო) მედიკამენტებზეც და განსაკუთრებით იმ ტიპის მედიკამენტებზე, რომლის მოხმარებაც განსაკუთრებით მაღალია საქართველოს მოსახლეობაში.

ცნობისთვის, საქართველოში რეფერენტული ფასწარმოქმნის სისტემის პირველი ეტაპი 2023 წლის 15 თებერვალს ამოქმედდა. ცვლილების მიხედვით, ფარმაცევტულმა კომპანიებმა კონკრეტულ მედიკამენტებზე დადგენილი ფასებით უნდა იხელმძღვანელონ. იმ შემთხვევაში, თუ აფთიაქები მედიკამენტებს, აღნიშნულ ფასზე ძვირად გაყიდიან, დაჯარიმდებიან. სისტემის ფარგლებში მედიკამენტების ჩამონათვალი ეტაპობრივად იზრდება. დღევანდელი მონაცემებით, ფასის ზედა ზღვარი 5 148 მედიკამენტზეა განსაზღვრული. აქედან, 3 045 წამალზე რეფერენტული ფასი უკვე მოქმედებს, 2 103 მედიკამენტზე კი ეტაპობრივად, უახლოეს პერიოდში შევა ძალაში.