კედელზე შემორჩენილი ნახატები ველისციხიდან, რომელიც დიდ ისტორიას ინახავს- ფოტოები
გურჯაანის მუნიციპალიტეტის სოფელ ველისციხეში, ისტორიული სახლის შესახებ ყველამ იცის, სადაც კედლის მხატვრობა დღემდეა შემორჩენილი.
ინფორმაციას სახლის შესახებ ადგილობრივი, თამარ მახარაშვილი ავრცელებს და აცხადებს, რომ ორსართულიანი შენობა სოფლის განაპირას, ხევის უბანში მდებარეობს.
გადმოცემის თანახმად, ამ სახლში საუკუნის წინ დუქანი ყოფილა, ვარაუდის მიხედვით კი ამ დუქანს ფიროსმანიც ხშირად სტუმრობდა.
,,როგორც ცნობილია ფიროსმანი დაგროვებულ ვალებს კედლებზე ხატვით ისტუმრებდა, თუმცა მკვლევარებმა წლების წინ ნახატებზე ყველაზე დიდი ქართველი მხატვრის კვალი ვერ დაინახეს. ორი ნახატი დღემდეა შემორჩენილი, ერთს აწერია “შენ გვაცხონე მარანო”. იატაკზე აგურია რომელსაც ლამაზი ასო “ფ” ამშვენებს.
ამ სახლშია ერთ-ერთი სცენა გადაღებული გიორგი შენგელაიას ფილმში “ხარება და გოგია”. ამ სახლში ცხოვრობნენ პედაგოგები რობერტ აკოლაშვილი და მისი მეუღლე, ლია სტურუა. სწორედ რობერტის უფროსმა ძმამ, გრანიკო აკოლაშვილმა ჩამოიყვანა კინორეჟისორი გიორგი შენგელაია ველისციხეში და მან შესთავაზა საკუთარი სახლი საცხოვრებლად, ხოლო მარანი გადაღებისთვის ფილმისათვის ,,ხარება და გოგია”,- წერს თამარ მახარაშვილი.
