კახეთში ხე-ტყის უკანონო მოპოვება-ტრანსპორტირების 14 ფაქტი გამოვლინდა

კახეთში ხე-ტყის უკანონო მოპოვება-ტრანსპორტირების 14 ფაქტი გამოვლინდა.

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის ინფორმაციით, 5 სამართალდარღვევაა გამოვლენილი საგარეჯოს მუნიციპალიტეტში, 3-3 ფაქტი – ახმეტისა და ყვარლის მუნიციპალიტეტებში; 2 სამართალდარღვევა დაფიქსირდა ლაგოდეხის, 1 კი, სიღნაღის მუნიციპალიტეტში.

მოქალაქეებმა უკანონოდ მოპოვებული წიფლის, რცხილის, ლიფანისა და მუხის ხე-მცენარეებისგან დაამზადეს, ჯამში, 44,5 კუბური მეტრი მოცულობის საშეშე მასალა და მის ტრანსპორტირებას ახორციელებდნენ; ერთ სამართალდამრღვევს კი, ავტომანქანის ძარაზე, უკანონოდ მოპოვებული ვერხვის სახეობის 9 ერთეული მორი ჰქონდა განთავსებული.

ავტოსატრანსპორტო საშუალებები და უკანონოდ მოპოვებული ხე-ტყე დაილუქა. სამართალდამრღვევების მიმართ შედგა შესაბამისი დოკუმენტაცია. მასალები, შესაბამის უწყებებში გადაიგზავნა.