გურჯაანის მერიამ, მუნიციპალიტეტის შემოსასვლელებში ტურისტული მანიშნებლების დიზაინის შესარჩევად კონკურსი გამოაცხადა

მანიშნებლები მუნიციპალიტეტის 6 შემოსასვლელში უნდა დამონტაჟდეს. ტურისტული მანიშნებელი კონსტრუქციის/ნაგებობის განთავსების ლოკაციებია: საგარეჯოდან შემოსასვლელი – ერთი ცალი; სიღნაღიდან ორი შემოსასვლელი – ორი ცალი; ლაგოდეხიდან შემოსასვლელი – ერთი ცალი; ყვარლიდან შემოსასვლელი – ერთი ცალი; თელავიდან შემოსასვლელი – ერთი ცალი.

გამარჯვებულ კონკურსანტთან გაფორმდება ხელშეკრულება საქონლის – ესკიზის შესყიდვის თაობაზე. მუნიციპალიტეტისათვის გადასაცემი საქონლის – ესკიზის ღირებულება განისაზღვრება კონკურსანტის მიერ შემოთავაზებული ფასის ოდენობით, მაგრამ არაუმეტეს წინასწარ ჩატარებული ბაზრის კვლევის შედეგად გამოვლენილი ღირებულებისა – 9676 ლარისა, მომსახურების გაწევასთან დაკავშირებული ყველა გადასახადისა და ხარჯის ჩათვლით ჩათვლით.

კონკურსში მონაწილეობის მიღება შეუძლია: მეწარმე ფიზიკურ პირს – ინდივიდუალური მეწარმე; საქართველოში რეგისტრირებულ იურიდიულ პირს;

დაინტერესებულმა პირებმა კონკურსის გამოცხადების ერთი თვის ვადაში გურჯაანის მუნიციპალიტეტის მერიის ოფიციალური ელექტრონული ფოსტის საშუალებით Megvineobismunicipaliteti@gmail.com უნდა წარმოადგინონ: ინფორმაცია კონკურსის მონაწილის შესახებ და ამონაწერი მეწარმეთა და არასამეწარმეო (არაკომერციული) იურიდიული პირების რეესტრიდან; ტურისტული მანიშნებელი კონსტრუქციის/ნაგებობის დიზაინი ესკიზის/ესკიზების სახით ელექტრონული ფორმით 3D ფორმატში, ასევე მატერიალური სახით A3 ფორმატით;

განმარტებითი ბარათი, რომელიც უნდა მოიცავდეს ინფორმაციას ესკიზში გამოყენებული ფერების, გამოსახულებების, სიმბოლოებისა და გამოსაყენებელი მასალის მნიშვნელობის, ასევე ესკიზის/დიზაინის მთავარ მესიჯთან „გურჯაანი – მეღვინეობის მუნიციპალიტეტი“ შესაბამისობის შესახებ. დიზაინის ესკიზის ფასი; საკონტაქტო ინფორმაცია: ტელეფონი და ელ. ფოსტის მისამართი.

საკონკურსო კომისიის შემადგენლობა განისაზღვრება გურჯაანის მუნიციპალიტეტის მერიისა და მოწვეული სპეციალისტებისაგან; კონკურსი ჩატარდება ერთ ეტაპად. უპირატესობა მიენიჭება კონკურსანტს, რომლის წარმოდგენილი ესკიზიც ყველაზე მეტად აკმაყოფილებს წაყენებულ ძირითად მოთხოვნებს და გამოირჩევა ვიზუალური ეფექტით; უპირატესობად მიიჩნევა აგრეთვე საკონკურსო განაცხადში მითითებულ ღირებულებაზე დაბალი ფასის შემოთავაზება;