„ფრენა დიდ ემოციებთანაა დაკავშირებული“ – გოგონა თუშეთიდან, რომელიც ბოინგის პილოტია

ახმეტის მუნიციპალიტეტის სოფელ ალვანში მცხოვრები მაგდა ქააძე ერთ-ერთი ახალგაზრდაა, რომელიც საქართველოს საავიაციო უნივერსიტეტის კურსდამთავრებული და ახლა უკვე მფრინავია.

მაგდა დღეს უკვე ერთ-ერთი პირველი პილოტი ქალია საქართველოში, რომელიც ,,ბოინგ 737’’-ს მართავს.
მაგდა ამბობს, რომ აღნიშნულ პროფესიაზე არ უოცნებია და არც ფიქრობდა, რომ ამ მიმართულებით დაიწყებდა საქმიანობას, თუმცა როცა პროფესიის არჩევაზე დაფიქრდა, გადაწყვიტა პილოტი გამხდარიყო ბევრი სწავლით და დაუღალავი შრომით მიზანს მიაღწია და ახლა ერთ-ერთი ახალგაზრდა პილოტია, რომელიც ბოინგს მართავს და სხვადასხვა მიმართულებით ფრენებს ასრულებს.
როგორც ახალგაზრდა ამბობს, პილოტისთვის მთავარი საქმეზე ორიენტირებულობა, პასუხისმგებლობა და ბევრი სწავლაა. მაგდა განმარტავს, რომ საავიაციო უნივერსიტეტში სწავლის პარალელურად, პრაქტიკას თელავის აეროდრომ ,,მიმინოში“ გადიოდა, რაც როგორც თავად ამბობს, პირველი და დიდი გამოცდილება იყო მისთვის.

,,რომ გითხრათ ამ პროფესიაზე ბავშვობიდან ვვოცნებობდი, მოგატყუებთ. ამ საკითხზე არც მიფიქრია. როცა დავინტერესდი ავიაციით, პირველად ჩავაბარე ეროვნული გამოცდები საავიაციო უნივერსიტეტში სასწავლებლად. ჩავირიცხე და დავიწყე თეორიული და პრაქტიკული სწავლება. თეორიული სწავლება მიმდინარეობდა თბილისში, უნივერსიტეტში, პრაქტიკული სწავლება კი მიმდინარეობდა თელავში, აეროდრომ ,,მიმინოში’’. დღესაც პრაქტიკულ სწავლებას მანდ გადიან სტუდენტები.

როდესაც მოვრჩით სწავლებას, მერე მოგვიწია ინსტრუქტორთან ერთად სწავლების გატარება და ფრენა. იქიდან გამომდინარე, რომ ჩვენ არ გვქონდა შესაბამისი გამოცდილება გვემართა თვითმფრინავი, ინსტრუქტორთან ერთად ვასრულებდით ფრენებს. მერე როცა ეს საკითხებიც შევისწავლეთ და დარწმუნდა ინსტრუქტორიც, რომ მზად ვიყავით იმისთვს რომ დამოუკიდებლად გვემუშავა, დავიწყეთ მუშაობა’’,- განუცხადა knews.ge-ს მაგდა ქააძემ.

მისივე თქმით, სწავლასთან ერთად, მუშაობა 2018 წელს “ჯორჯიან ეარვეისში” დაიწყო. მისი თქმით, მთავარი არა სქესი, არამედ პროფესიონალიზმია.

,,განსაკუთრებით რთულ სიტუაციაში არ აღმოვჩენილვარ, თუმცა იყო რამოდენიმე შემთხვევა როდესაც საკმაოდ რთული მეტეოროლოგიური პირობები იყო, თუმცა, რასაკვირველია, როდესაც ხარ მფრინავი – ყველაფრისთვის მზად უნდა იყო. მიმაჩნია, რომ მთავარია პროფესიონალიზმი და არა – სქესი, ჩემი თანამშრომლებიც ასე ფიქრობენ”,– განაცხადა მაგდა ქააძემ.

ახალგაზრდა აცხადებს, რომ ამ დროისთვის ,,ბოინგ 737’’- ის პილოტია და მთავარ პილოტთან ერთად სხვადასხვა მიმართულებით ფრენებს ასრულებს.

,,როდესაც თვითმფრინავის კაბინაში შევდივარ, ვამოწმებ ხომ ყველაფერი წესრიგშია, რომ რამე არ იყოს გამორჩენილი. მერე გადავდივარ სისტემების მართვის პანელზე და ვამოწმებ სისტემების გამართულად მუშაობას. ყველა დეტალის შემოწმების შემდეგ საჭეს ასწორებს და რეისებზე ახლა ორი დავფრინავთ მე და მთავარი მფრინავი. ჩემი პოზიციაა მეორე მფრინავი. ეს არის სერიოზული სფერო და საერთაშორისო ორგანიზაციების მიერ დადგენილი ნორმებით ვხელმძღვანელობთ. ყველა ვალდებულია მიყვეს ამ ინსტრუქციებს. გარდა ამისა, უსაფრთხოების თვალსაზრისითაც მნიშვნელოვანია, რომ ამას მიყვე.

რაც შეეხება ფრენებს, გაწერილი არ გვაქვს ვინ როდის და სად უნდა წავიდეთ. დაგეგმარების სამსახური ყავს ავიაკომპანიას და ის ანაწილებს ეკიპაჟებს ისე, რომ სამუშაო საათები იყოს სწორად გადანაწილებული. არ უნდა მოხდეს სამუშაო საათების გადაჭარბება. ადამიანისთვის რომელსაც პილოტის პროფესიაზე უნდა მუშაობა, უნდა უყვარდეს თავისი საქმე და ჰქონდეს პასუხისმგებლობა. ძალიან ბევრი შრომაა საჭირო რომ აქამდე მოხვიდე’’,- აცხადებს მაგდა.