გურჯაანში გიორგი ბოტკოველის ჩასვლას ხმაური და სიტყვიერი დაპირისპირება მოჰყვა

გურჯაანში “ნაციონალური მოძრაობის” რეგიონული მდივნისა და პარლამენტის დეპუტატის, გიორგი ბოტკოველის ჩასვლას ხმაური და სიტყვიერი დაპირისპირება მოჰყვა.

დაპირისპირება ადგილობრივებსა და “ნაციონალური მოძრაობის” წევრებს შორის მას შემდეგ დაიწყო, რაც გიორგი ბოტკოველმა სტიქიის შედეგად დაზარალებულ მოსახლეობასთან შეხვედრაზე ხელისუფლება გააკრიტიკა. ადგილობრივების ნაწილმა ოპოზიციის წარმომადგენლებს მოუწოდეს, რომ განცხადებების ნაცვლად სტიქიის სალიკვიდაციო სამუშაოებში ჩართულიყვნენ.

„ნაციონალური მოძრაობის“ წევრმა, გიორგი ბოტკოველმა ჟურნალისტებთან საუბრისას გურჯაანში მომხდარ ინციდენტთან დაკავშირებით განაცხადა, რომ ხალხს არ აინტერესებს ვინ ვის დაუპირისპირდება და მიუვარდება, ხალხის ინტერესი პრობლემების დროულად მოგვარებაა. მისივე თქმით, წუხელ გურჯაანში მაშველები ნამდვილად მუშაობდნენ, თუმცა აღნიშნავს, რომ მეტი ჩართულობა და ცენტრალური ხელისუფლებიდან მეტი მხარდაჭერაა საჭირო.

„მთელი ღამის განმავლობაში ჩვენც აქ ვიყავით. ვხედავდით, რომ მაშველები მუშაობენ, მაგრამ მეტი მობილიზებაა საჭირო ამ ყველაფრისთვის. რა თქმა უნდა, ინფრასტრუქტურის მოწესრიგებასთან ერთად, ზარალის დათვლა მნიშვნელოვანია. ჩვენ ვნახეთ ძალიან ბევრი სავარგულები, რომელიც მთლიანად არის განადგურებული. ადამიანებს ფაქტობრივად, წლის მოსავალი აღარ აქვთ. რა თქმა უნდა, მეტი მობილიზება, მეტი აქტიურობა და მეტი ჩართულობაა საჭირო, რომ დროზე მოხდეს ამ პრობლემების მოგვარება“, – განაცხადა ბოტკოველმა.

ფოტო: ინტერპრესნიუსი