სოფელ გავაზში ამერიკული ფესტივალი გაიმართება

5 ივნისს, 13:00 საათზე, ყვარლის მუნიციპალიტეტის სოფელ გავაზში ამერიკული ფესტივალი გაიმართება.

ღონისძიების ორგანიზატორის, ,,ცოდნის კაფე გავაზი – Knowledge Cafe Gavazi”-ს წარმომადგენლების თქმით, ეს დღე იქნება ყველაზე სახალისო, ინფორმაციული და საინტერესო ყველა სტუმრისთვის. მათივე თქმით, აღნიშნული ღონისძიების ფარგლებში, დაგეგმილია სხვადასხვა სახის ღონისძიებები.

,,პირველად რეგიონის მასშტაბით, გვაქვს ბედნიერება, რომ გავაზის საჯარო სკოლის ეზოში ვუმასპინძლოთ ამერიკულ ფესტივალს. ეს იქნება ხალისის, საინტერესო ინფორმაციის მიღების, მუსიკის, საჭმლის, დესერტებისა და ბევრი გასართობი აქტივობის ადგილი. ფესტივალზე წარმოდგენილი იქნებიან ყვარლის მუნიციპალიტეტის სხვადასხვა სკოლის მოსწავლეები, რომლებიც ყველა დაინტერესებულს გაუზიარებენ ინფორმაციას, შესთავაზებენ სახალისო თამაშებს, გაათამაშებენ პრიზებს და გაავრცელებენ იმ საკითხებზე ინფორმაციას, რომლებზეც ისინი დიდი ხანი მუშაობდნენ. ფესტივალზე ასევე იქნება ამერიკული ბურგერები, ჰოთ-დოგები, ამერიკული დესერტები და, რა თქმა უნდა, კოკა-კოლა.
ფესტივალის “ამერიკული დღეები კახეთში” მიზანია სკოლის მოსწავლეებს მისცეს მიმართულება, მიიღონ დამატებითი ცოდნა; ამასთანავე გაუზიარონ თანატოლებსა თუ ზრდასრულებს ეს ინფორმაცია. პროექტი დაფინანსებულია ამერიკის სახელმწიფო დეპარტამენტის განათლებისა და კულტურის ბიუროს მიერ. პროექტის მხარდამჭერია “კოკა-კოლა ბოთლერს ჯორჯია”,– აცხადებენ ღონისძიების ორგანიზატორები.