როგორ იცავს ენერგოომბუდსმენი მომხმარებელთა უფლებებს – პრობლემები და გამოწვევები

მომხმარებელთა ინტერესების საზოგადოებრივი დამცველის აპარატი კახეთის რეგიონში, რვა წელია ფუნქციონირებს. უწყება ერთგვარ შუამავალ რგოლს წარმოადგენს მომხმარებელსა და ენერგოკომპანიებს შორის არსებული დავების განხილვაში.

მომხმარებელთა ინტერესების საზოგადოებრივი დამცველის აპარატის კახეთის ბიუროს წარმომადგენლის, სოფია აივაზაშვილის განცხადებით, სამსახური უზრუნველყოფს მომხმარებელთა უფლებების დაცვას ბუნებრივი აირის, ელექტროენერგიისა და წყალმომარაგების მიმართულებით.

,,სამივე სექტორი ყველასთვის მნიშვნელოვანია და აქტუალურ თემას წარმოადგენს, რომელსაც გააჩნია თავისი სპეციფიკა. თითოეულ სექტორში არის განსხვავებული ტიპის საკითხები”.

ენერგოომბუდსმენის ინფორმაციით, უწყებისთვის მოქალაქეების ხმის მიწვდენა მარტივად არის შესაძლებელი. მისივე თქმით, პანდემიის პერიოდში უწყებამ დანერგა მარტივი მეთოდი, რომლის მეშვეობითაც მოქალაქეებს შეუძლიათ მიმართონ.

,,მოქალაქეთა მომართვიანობა ძირითადად ეხება კომპანიების მიერ უსაფუძვლოდ დარიცხულ თანხებს, კომპანიების, ხანდაზმულ დავალიანებებს, რომელიც მომხმარებელთა ბარათებზე კვლავ არსებობს და მომსახურების ხარისხს. რაც შეეხება მომართვიანობას, განცხადება უნდა შეიცავდეს მისამართს, სახელს, გვარს, პირად ინფორმაციას და თუ რა საკითხი აქვს მოსაგვარებელი მოქალაქეს. მოწოდება შეუძლიათ როგორც მეილზე, კარგი ხარისხის ფოტოს ატვირთვით, ასევე მესინჯერის საშუალებით. მხოლოდ დაელოდონ ჩვენგან დასტურს, რომ განცხადება მივიღეთ. ჩვენი სამსახური სრულიად უსასყიდლოდ ეხმარება მოსახლეობას”.

ენერგოომბუდსმენის ინფორმაციით, უწყება თანამშრომლობს ადგილობრივ თვითმმართველობასთან. ისინი ხვდებიან ადმინისტრაციული ერთეულების წარმომადგენლებს და აწვდიან ინფორმაცის თუ როგორ უნდა დაუკავშირდეს მოქალაქე უწყებას.

,,სოფლებში ვატარებთ გასვლით შეხვედრებს, საზოგადოებას ვაცნობთ ინფორმაციას როგორ მოგვმართონ და რა საკითხებზე. შეხვედრებს ესწრებიან ადმინასტრაციის ერთეულის თანამშრომლები, რაც ძალიან მნიშვნელოვანია. სოფელში მცხოვრები მოქალაქისთვის პირველი რგოლი ადმინისტრაციული ერთეულის წარმომადგენელია ვისაც გარკვეული საკითხების მოგვარების შესახებ აკითხავენ. გარდა ამისა, მოსახლეობას შეუძლიათ, დაგვიკავშირდნენ ფეისბუქ გვერდის მეშვეობითაც. ასევე, აქტიურად ფუნქციონირებს უწყების საიტიც www.pdci.ge, სადაც საზოგადოებას შეუძლია მოიძიოს სასურველი ინფორმაცია. ჩვენ ვმუშაობთ ისეთ საკითხებზე, რაც მოითხოვს სწრაფ რეაგირებას. ვთანამშრომლობთ სერვის ცენტრების მენეჯერებთან, ეს გვაძლევს საშუალებას მოვახდინოთ სწრაფი რეაგირება ამა თუ იმ საკითხზე. არ ვუქმნით მოქალაქეებს დამატებით ბარიერებს რომ მოვიდნენ ადგილზე და დაწერონ განცხადება, ძალიან მოქნილი სისტემა გვაქვს კომუნიკაციის. მათ შეუძლიათ, დარეკონ ცხელ ხაზზე და ზეპირსიტყვიერადაც მოგვაწოდონ ინფორმაცია. მომართვიანობა საკმაოდ ბევრი გვაქვს. მოქალაქის ცნობიერებაც წინა წლებთან შედარებით ამაღლებულია. კომპანიები ვალდებულები არიან მოგვაწოდონ სერვისები ხარისხიანად. ამიტომ, მინდა მოალაქეებს ვუთხრა რომ ბუნებრივ აირთან, ელექტროენერგიასთან და წყალმომარაგებასთან დაკავშირებულ საკითხებზე დაუყოვნებლოვ მოგვმართონ. მოგეხსენებათ, რომ ,,თელავგაზი” ახალი კომპანიაა და ნებისმიერი ტიპის პრობლემის შემთხვევეაში, ეს იქნება ძველი მრიცხველი თუ სხვა, დაგვიკავშირდნენ და გაიარონ კონსულტაცია.”

ბუნებრივი აირი, ელექტროენერგია და წყალმომარაგება – ამ სამ ძირითად საკითხზე ყველა მოქალაქეს შეუძლია რაც აწუხებს იმ პრობლემით მიმართოს უწყებას და მიიღოს საჭირო დახმარება. ცხელი ხაზი: 16 216.

საკითხის შესახებ ვრცელი ინფორმაცია იხილეთ ჩვენს რადიო გადაცემაში