ბაზრობებზე მოვაჭრეებისთვის სალარო აპარატების გამოყენების ვალდებულება კიდევ ერთხელ გადავადდება

ბაზრობებზე მოვაჭრეებისთვის სალარო აპარატების გამოყენების ვალდებულება კიდევ ერთხელ გადავადდება.

აღნიშნულ საკითხზე განცხადება მთავრობის სხდომის დასრულების შემდეგ ფინანსთა მინისტრმა ლაშა ხუციშვილმა გააჟღერა.

3 წლით გადავადდება ბაზრობებზე სალარო აპარატის გამოყენების ვალდებულება, რომელიც 2023 წლის 1-ელ იანვრიდან უნდა ამოქმედებულიყო“, – განაცხადა ხუციშვილმა.

შეგახსენებთ, შესაბამისი ცვლილებები პარლამენტმა ჯერ კიდევ 2019 წელს მიიღო. საგადასახადო კოდექსში შეტანილი ცვლილებების თანახმად, 2022 წლის 1 იანვრიდან ბაზრობის ტერიტორიაზე ვაჭრობის განმახორციელებელი ფიზიკური პირი ვალდებული უნდა ყოფილიყო, საქონლის მიწოდებისას გამოეყენებინა საკონტროლო-სალარო აპარატი.

კანონპროექტის ამოქმედება გასულ წელს გადაიდო 2023 წლის პირველ იანვრამდე და მაშინ არგუმენტად პანდემია დასახელდა, ხოლო დღეს კანონის გადავადების მიზეზი არ განმარტებულა.