თბილისიდან თელავამდე ჩასვლა 1 საათსა და 20 წუთში იქნება შესაძლებელი

კახეთის რეგიონში ახალი მაგისტრალის მშენებლობა გრძელდება. ამ ეტაპზე, აქტიური სამშენებლო სამუშაოები თბილისი-საგარეჯოს 35 კმ-იან და ბაკურციხე-წნორის 16.6 კმ-იან მონაკვეთებზე მიმდინარეობს.

საავტომობილო გზების დეპარტამენტის ინფორმაციით, თბილისი-საგარეჯოს მონაკვეთი თბილისისკახეთთან დამაკავშირებელი ძირითადი მაგისტრალის და აზერბაიჯანის ჩრდილო–დასავლეთ რეგიონთან დამაკავშირებელი სატრანზიტო დერეფნის ნაწილია.დაგეგმილი მონაკვეთის დასრულების შემდეგ, თბილისიდან თელავამდე ჩასვლა 1 საათსა და 20 წუთში იქნება შესაძლებელი.

,,არსებული გზა გადის მჭიდროდ დასახლებულ სოფლებსა და ქალაქებში (ვაზიანი, სართიჭალა, ნინოწმინდა და საგარეჯო). ახალი გზა კი, განტვირთავს მოძრაობას დასახლებულ პუნქტებში, რითაც მკვეთრად გააუმჯობესებს უსაფრთხოების სტანდარტს და შეამცირებს მგზავრობის დროს. თბილისი-საგარეჯოს 35 კმ-იანი გზის მშენებლობა 3 მონაკვეთზე ხორციელდება – ვაზიანის შემოვლით გზაზე, ვაზიანი-საგარეჯოს მონაკვეთსა და საგარეჯოს შემოვლით გზაზე. ვაზიანის შემოვლითი გზის დასრულება 2023 წელს, ხოლო დანარჩენი ორი მონაკვეთის – 2024 წელს იგეგმება. პროექტი სახელმწიფო ბიუჯეტიდან 527 169 937 ლარით ფინანსდება.

სამუშაოები დაიწყო ბაკურციხე-წნორის შემოვლით გზაზეც, რომელიც გვერდს აუვლის მჭიდროდ დასახლებულ წნორსა და 6 მიმდებარე სოფელს. ახალი შემოვლითი გზა ალაზნის ველის მხარეს შენდება და თბილისი-ბაკურციხე-ლაგოდეხი-აზერბაიჯანის საზღვრის საერთაშორისო გზას დააკავშირებს არსებულ შიდასახელმწიფოებრივ გზასთან. სამუშაოები აზიის განვითარების ბანკის 87.8 მილიონ ლარის ფინანსური მხარდაჭერით მიმდინარეობს. სატენდერო პროცედურები მიმდინარეობს საგარეჯო-ბადიაურის 17 კმ-იანი მონაკვეთის მშენებლობისთვისაც. საერთო ჯამში, კახეთის საგზაო ქსელის განვითარებას 2 მილიარდი ლარი მოხმარდება. ყველა მიმდინარე და დაგეგმილი მონაკვეთის დასრულების შემდეგ, თბილისიდან თელავამდე ჩასვლა 1 საათსა და 20 წუთში იქნება შესაძლებელი”,- აცხადებენ საავტომობილო გზების დეპარტამენტში.