დღეიდან კლინიკები დაფინანსების ახალ მოდელზე (DRG) გადადიან

დღეიდან, ჯანდაცვის სამინისტრო კლინიკების დაფინანსების სისტემას ცვლის და სამედიცინო დაწესებულებები DRG-ის, იგივე მომსახურების დიაგნოზთან შეჭიდული ჯგუფების დაფინანსების მოდელზე გადაჰყავს.

თუ აქამდე სახელმწიფო კლინიკას კონკრეტულ შემთხვევაზე დადგენილი ტარიფების მიხედვით უხდიდა ანაზღაურებას, 1 ნოემბრიდან პაციენტისთვის გაწეული მომსახურება დიაგნოზის მიხედვით ანაზღაურდება.

აღსანიშნია, რომ ეს მიდგომა მხოლოდ საყოველთაო ჯანდაცვის პროგრამას ეხება და არ ვრცელდება კერძო სადაზღვევო კომპანიებსა და კლინიკებს შორის ურთიერთობებზე.

DRG-ის არსი სწორედ იმაში მდგომარეობს, რომ დიაგნოზით მსგავსი სტაციონალური შემთხვევების ტიპების კლასიფიკაცია ჯგუფებად ხდება.

როგორც ჯანდაცვის სამინისტროს მესვეურები განმარტავენ, დაფინანსების ასეთი მოდელის მიხედვით ჯამში 608 DRG ჯგუფი და 26 დიაგნოსტიკური კატეგორია შეირჩა. თითოეული დიაგნოზისთვის DRG-ის ფასი ორი კომპონენტისგან შედგება. ესაა საბაზისო ტარიფი და ღირებულებითი წონა.