გაიცანით პედაგოგი და ხელოვანი 22 წლის ახალგაზრდა ფერი ისმაილოვა უზუნთალადან

22 წლის ფერი ისმაილოვა ლაგოდეხის მუნიციპალიტეტში, ეთნიკური აზერბაიჯანელებით დასახლებული კაბლის თემის სოფელ უზუნთალაში, დედასთან ერთად ცხოვრობს.

ის ილიას სახელმწიფო უნივერსიტეტის ფილოლოგიის ფაკულტეტზე სწავლობს მეორად პროფესიად კი ფსიქოლოგია აქვს არჩეული. გოგონა ამზადებს და ყიდის ხელნაკეთ ნივთებს. ის სწავლობს და ასწავლის ქართულს, უკრავს კალიმბაზე და უკულელეზე, ოცნებობს ფანდურზე დაკვრაც ისწავლოს. გარდა ამისა, ფერი ეხმარება ადგილობრივ ქალებს და გოგონებს სახელმწიფო ენის შესწავლაში და ასევე ფსიქოლოგიურ კონსულტაციებსაც უწევს მათ.

knews.ge-სთან საუბრისას ფერი აცხადებს, რომ ბრძოლა ამ ყველაფრის მისაღწევად ჯერ კიდევ სკოლის ასაკიდან დაიწყო, მაშინ როდესაც მისი კლასელები დაოჯახებას იწყებდნენ.

ფერის თქმით, სწორედ მაშინ დაისახა მიზნად ბევრი ესწავლა, მიეღო განათლება და კარგად შეესწავლა სახელმწიფო ენა. ის დღეს ბევრ რამეში ეხმარება თანასოფლელებს, ქალებს. ასევე, ბავშვებს ასწავლის ქართულს და მუშაობს თარჯიმანის პოზიციაზე.

,,ვარ სტუდენტი და ვცხოვრობ ლაგოდეხის მუნიციპალიტეტის სოფელ უზუნთალაში, სადაც ცხოვრობს ეთნიკურად აზერბაიჯანელი მოსახლეობა. სწავლისას ფილოლოგია ავირჩიე იმიტომ, რომ ქართულის სწავლის პრობლემა გვქონდა ახალგაზრდებს. სკოლაში მასწავლებელი არ გვასწავლიდა კარგად და მქონდა სურვილი ჩემით მესწავლა.

სოფელში არ გვყავდა ფსიქოლოგი და ამიტომ ავირჩიე რომ დავეხმარო ყველას. ახლა ვეხმარები ჩემს ახლობლებს და მეგობრებს ფსიქოლოგიურად, ასევე, ბავშვებს ვასწავლი ქართულ ენას. ეს ჩემთვის ძალიან მნიშვნელოვანი და საპასუხისმგებლოა,’‘- ამბობს ფერი ისმაილოვა

გარდა ფსიქოლოგიის და ფილოლოგიისა, ფერი ასევე ქსოვს და ყიდის სამოსს, აქვს წიგნების ონლაინ მაღაზია. უკრავს უკულელეზე, კალიმბაზე და ახლა ფანდურზე დაკვრასაც სწავლობს. გარდა ამისა, ქმნის სხვადასხვა სამკაულებს და ,,გვირილას” ბრენდის სახელით ყიდის.

,,ჩემი საყვარელი საქმე არის ხელნაკეთი ნივთების გაკეთება, რომელსაც ,,გვირილა” დავარქვი. ვამზადებ სხვადასხვა სახის სამკაულს და ვყიდი. ბავშვობაში მინდოდა, რომ მქონოდა ჩემი საკუთარი შემოსავალი. ერთხელ ბანაკში ვიყავი, ბაკურიანში, და ვნახე, რომ გოგოები ქსოვდნენ სამაჯურს და მეც ვისწავლე. შემდეგ გამიჩნდა სურვილი, რომ მესწავლა ჩხირებით ქსოვა და ბევრი რამის კეთება შემძლებოდა.

როცა გვერდი შევქმენი, ჩემი კურსელები დაინტერესდნენ, მოჰქონდათ ძაფები და მე მათთვის ვქსოვდი. შემდეგ ვიფიქრე, რომ ეს საქმე გადამექცია ბიზნესად. მეგობარმა იცის გრაფიკული დიზაინი და ჩემთვის შექმნა ლოგო.

ხშირად ვერ ვახერხებ შეკვეთების დამზადებას, რადგან ძაფები ძვირია და დროს მოითხოვს. ონლაინ სწავლამ შემიშალა ამაში ხელი, რადგან სოფელში ვარ და რთულია ნივთის გაგზავნა.
ველოდები როდის დასრულდება ეს, რომ აქტიურად მივიღო შეკვეთები და ფოსტის საშუალებით მსურველთან შევძლო გაგზავნა”,- განუცხადა knews.ge-ს ფერი ისმაილოვამ.

ამ ეტაპისთვის, ახალგაზრდა ქართული ენის გაკვეთილებს ბავშვებს უტარებს და ცდილობს, რომ მათ კარგად ისწავლონ სახელმწიფო ენა. ის, ასევე, ორგანიზაცია ,,ფემინაში” თარჯიმნად მუშაობს.

,,ქართულ ენაში ვამზადებ ბავშვებს. მათ სახლში ყოველდღე ვიღებ. ზოგი მასწავლებელი მეჩხუბება ამას რომ ვამბობ, მაგრამ ვერ სწავლობენ სკოლაში ქართულს კარგად. ბავშვებმა არ იციან წერა და კითხვა. არ მაქვს დაფა, მარკერები, ფურცლები, რომ ბმავშვებისთვის კარგად მესწავლებინა ქართული ენა. ფეისბუქში გამოვაქვეყნე პოსტი და დავიწყე ფულის შეგროვება, რომ ბავშვებისთვის მეყიდა დაფა.

ამჟამად თარჯიმნად ვმუშაობ არასამთავრობო ორგანიზაციაში ,,ფემინა”. ისინი აქვეყნებენ ფოტოისტორიას, მე მას ვთარგმნი და აქედან მაქვს მცირე შემოსავალი,”,-აღნიშნავს ახალგაზრდა.

ფერი ამბობს, რომ სახლში მხოლოდ დედა და თვითონ ცხოვრობენ.
მისი თქმით, თემში გავრცელებული სტერეოტიპებიდან გამომდინარე, ბავშვობიდან ბევრ წინააღმდეგობას წააწყდა, თუმცა ამან არ შეაშინა და სწავლა არ შეწყვიტა.

,,რაც შეეხება ჩემს ოჯახს, ორი ვართ- მე და დედა. პატარაობიდან ჩემ მიმართ ახლობლებს ჰქონდათ მცდელობა, რომ ჩაეშალათ ჩემი ოცნებები და სურვილები.

ახლა ისე ამაყობენ ჩემით, თითქოს წვლილი აქვთ შეტანილი ჩემს სწავლაში. მხოლოდ ერთი დეიდა დამიდგა გვერდით და დამეხმარა სწავლაში,”,- აცხადებს ფერი ისმაილოვა.