2021 წელს საქართველოში 60 000-მდე ადამიანი გარდაიცვალა

2021 წლის განმავლობაში საქართველოს დემოგრაფიული მდგომარეობა დრამატულად გაუარესდა. ქვეყანაში გარდაცვალების ოფიციალურმა სტატისტიკამ 59,906 შეადგინა.

COVID-19-ის პანდემიის დაწყების შემდეგ ქვეყანაში სიკვდილიანობა მკვეთრად გაიზარდა. თუკი 2019 წელს ქვეყანაში 46,500 გარდაცვალება აღირიცხა, 2020 წელს ის 50,500-მდე, 2021 წელს კი 59,900-მდე გაიზარდა.

ამავდროულად შემცირდა შობადობაც, გასული წლის განმავლობაში საქართველოში სულ 45,946 ბავშვი დაიბადა, შედეგად ქვეყნის ბუნებრივმა მატებამ, ანუ სხვაობამ დაბადებასა და სიკვდილიანობას შორის მინუს 13,960 შეადგინა. ეს ბუნებრივი მატების სტატისტიკის აღრიცხვის დაწყების, ანუ 1994 წლის შემდეგ ყველაზე მძიმე შედეგია.

რამდენი ადამიანი იბადებოდა და იღუპებოდა წინა წლებში ყოველდღიურად:
2018 წელი – დღეში იბადებოდა 140 ადამიანი; იღუპებოდა 127 ადამიანი;
2019 წელი – დღეში იბადებოდა 132 ადამიანი; იღუპებოდა 128 ადამიანი;
2020 წელი – დღეში იბადებოდა 127 ადამიანი; იღუპებოდა 138 ადამიანი;
2021 წელი 12 თვე – დღეში იბადებოდა 126 ადამიანი; იღუპებოდა 164 ადამიანი;
კორონავირუსის პანდემიის დაწყების შემდეგ, საქართველოში უშუალოდ COVID-19-ით 16,739 ადამიანი გარდაიცვალა.