სოფელ მელაანში მოქმედმა გესთჰაუსმა დამსვენებლების მიღება დაიწყო
გურჯაანის მუნიციპალიტეტის სოფელ მელაანში მოქმედმა ეკოტურისტულმა კომპლექსმა „Melaanian Vintage – Guest House“ დამსვენებლების მიღება დაიწყო.
კომპლექსის წარმომადგენლების ინფორმაციით, მათ სექტემბერში პირველ დამსვენებლებს უმასპინძლეს. როგორც თეო თაბორიძე აცხადებს, ამ ეტაპისთვის ადგილობრივი ვიზიტორები ჰყავდათ, მარტიდან კი უკვე საერთაშორისო ვიზიტორების ჯავშნებიც აქვთ.
„Melaanian Vintage – Guest House“-ს საკმაოდ წარმატებული წელი ჰქონდა, საოჯახო სასტუმრომ „CENN“- ის მიერ ორგანიზებულ კონკურსში „საუკეთესო მწვანე ტურისტული ბიზნესის“ ნომინაციაში გაიმარჯვა.
„Melaanian Vintage – Guest House ეკოტურისტული ობიექტია და, რა თქმა უნდა, მწვანე პრინციპებს მომსახურებაშიც ავსახავთ, ჩვენი ბიზნესი დიდ მნიშვნელობას ანიჭებს ადგილობრივი თემის გაძლიერებას, ბუნებრივი ტყის პროდუქტებისგან დამზადებული პროდუქციის წარმოებას და, რაც მთავარია, ვცდილობთ ბუნებას ზიანი არ მივაყენოთ, სწორედ ეს მიდგომები გახდა ამ ნომინაციაში გამარჯვების მიზეზი. ეს შედეგი სტიმულია იმისთვის, რომ უფრო მეტად ვიზრუნოთ გარემოზე, ადგილობრივებზე და შევქმნათ საინტერესო მწვანე ტურისტული პროდუქტები“ – ყვება თეო თაბორიძე.
ცნობისთვის, ეკოპრინციპებზე აგებული საოჯახო კომპლექსი დამსვენებელს სასტუმროში განთავსებას, კვებას, დეგუსტაცია-მასტერკლასებსა და ტურებს სთავაზობს. Melaanian Vintage –Guest House“-ის დამფუძნებელმა პროექტი ნულოვანი ინვესტიციით განახორციელა, შემდგომ კი ორგანიზაცია „აწარმოე საქართველოში“ გრანტი მოიპოვა.