დედოფლისწყაროსა და სიღნაღის მუნიციპალიტეტებში რთველი დაიწყო

კონდიციური ყურძნის მოსავლის დაბინავება კახეთში ტრადიციულად დედოფლისწყაროსა და სიღნაღიდან დაიწყო, მომავალი კვირიდან კი რეგიონის სხვა მუნიციპალიტეტებში გაგრძელდება.

ღვინის ეროვნული სააგენტოს ინფორმაციით, რთველი 2021-ის ფარგლებში კახეთში სულ გადამუშავებულია 31 ათას ტონამდე ყურძენი: 8,3 ათასი ტონა საფერავი, 20 ათას ტონამდე რქაწითელი, 1,7 ათასი ტონა კახური მწვანე და დანარჩენი სხვადასხვა ჯიშის ყურძენია, აქედან 10 ათას ტონაზე მეტი დასეტყვილი ყურძენია.

,,26 აგვისტოს, ძლიერმა სეტყვამ და ქარმა, კახეთის რეგიონში, გურჯაანის, თელავისა და ყვარლის მუნიციპალიტეტებში, 4600 ჰა ფართობის ვენახები დააზიანა. 2 სექტემბერს სეტყვა კვლავ განმეორდა ყვარელსა და თელავში, დაზიანებულია 180 ჰა ფართობის ვენახები. 2 სექტემბერს დასეტყვილი ყურძენი შეუფერხებლად გადამუშავდება სახელმწიფო საწარმო შპს „მოსავლის მართვის კომპანიის“ მიერ, ხოლო 26 აგვისტოს დაზიანებული მოსავლის დაბინავება დასასრულს უახლოვდება.

ამასთან ერთად, უკვე დაწყებულია სეტყვისგან დაზარალებული აგროდაზღვევის სახელმწიფო პროგრამის ბენეფიციარების ზარალის დათვლა. სახელმწიფო, ყველა კულტურაზე სადაზღვევო პოლისის 70%-ის, ხოლო ვაზზე – 50%-ის დაფინანსებას ახდენს”,– განაცხადეს ღვინის ეროვნულ სააგენტოში.