კახეთში, ბავშვებში ტყვიის ტოქსიკური ზემოქმედების გამოვლენის მართვის მიზნით კვლევები დაიწყო
კახეთის რეგიონში 7 წლამდე ასაკის ბავშვებში სახელმწიფო პროგრამის ფარგლებში, ტყვიის ტოქსიკური ზემოქმედების ადრეული გამოვლენის და მართვის მიზნით კვლევები დაიწყო.
სახელმწიფო პროგრამა მესამე წელია მოქმედებს და კვლევების გარდა, იმ ბავშვებს, ვისაც სისხლში ტყვიის შემცველობა 5 მიკროდეცილიტრს აღემატება, სახელმწიფო მკურნალობის კურსითა და მედიკამენტებით უზრუნველყოფს.
კახეთის სახელმწიფო რწმუნებული, ირაკლი შიოშვილი გურჯაანის „ჯეო ჰოსპიტალსში” კვლევის მიმდინარეობას სამედიცინო პერსონალთან ერთად დაესწრო.
„კახეთის რეგიონში, გურჯაანის „ჯეო ჰოსპილტალსში” 7 წლამდე ასაკის ბავშვებში მიმდინარეობს სისხლში ტყვიის კონცენტრაციის განსაზღვრა უფასოდ. რეგიონის მასშტაბით, მშობლებს შესაძლებლობა აქვთ, რომ შვილებს გურჯაანის „ჯეო ჰოსპიტალსის” ბაზაზე არსებულ ლაბორატორიაში უფასოდ ჩაუტარონ აღნიშნული კვლევა და მიიღონ შესაბამისი მომსახურეობა. ამ ეტაპზე 14 ბავშვია რეგისტრირებული კვლევის ჩასატარებლად“- აღნიშნა ირაკლი შიოშვილმა.
სამედიცინო დაწესებულების ხელმძღვანელის, დეა ცაბუტაშვილის თქმით, მსგავსი კვლევის ჩატარება აუცილებელია.
„ეს პროგრამა რამდენიმე წელია ხორციელდება. დღეიდან ვაგრძელებთ აღნიშნულ პროექტს. მოგეხსენებათ, რომ ტყვია არის ისეთი ელემენტი, რომლის სისხლში შემცველობა არანაირი კონცენტრაციით არ არის დასაშვები. ტყვიის შემცველობის ზრდა სისხლში იწვევს ბევრ პათოლოგიას. შესაბამისად, ძალიან მნიშვნელოვანია, როდესაც ტყვიის შემცველობას აღმოვაჩენთ ადრეულ ასაკში სხვდასხვა დაავადებების პრევენციის მიზნით.
დღეს, მოვიდნენ ჩაწერილი ბავშვები, რომელთაც გასულ წელს ჰქონდათ პრობლემა და წელს უკვე შესაძლებლობა ექნებათ, რომ საჭიროების შემთხვევაში სახელმწიფოს მხრიდან მედიკამენტური მკურნალობა უფასოდ მიიღონ“- აღნიშნა დეა ცაბუტაშვილმა.