„გასულ წელს საქართველოდან ევროკავშირში 67%-ით მეტი საქონელი გავიდა, ვიდრე რუსეთში“

საქართველომ 2018 წელს ევროკავშირში 67%-ით (293 მლნ დოლარით) მეტი საქონლის ექსპორტი განახორციელა, ვიდრე რუსეთში. ამის შესახებ „საერთაშორისო გამჭვირვალობა-საქართველოს“ ინფორმაციაშია აღნიშნული.
ორგანიზაციაში აცხადებენ, რომ ევროკავშირში ექსპორტი მნიშვნელოვნად 2014 წლიდან გაიზარდა, რასაც ხელი ევროკავშირთან თავისუფალი ვაჭრობის ხელშეკრულების გაფორმებამ შეუწყო.
,,2018 წელს ევროკავშირის ქვეყნებიდან ყველაზე მეტი ქართული პროდუქცია ბულგარეთში (259 მლნ დოლარი), ესპანეთში (62 მლნ დოლარი), რუმინეთსა (58 მლნ დოლარი) და გერმანიაში (52 მლნ დოლარი) შევიდა. საქართველოდან ევროკავშირში გადის: თხილი, ღვინო, სპირტიანი სასმელები, მინერალური წყალი, უალკოჰოლო სასმელები, ხილ-ბოსტნეულის კონსერვები, ხილი, ჩირი, ჯემები, მინის ნაწარმი, პლასტმასის ნაწარმი, იზოტოპები, ავეჯი, ფეროშენადნობები, ძვირფასი ლითონები და სხვა,“-აცხადებენ ორგანიზაციის წარმომადგენლები.
ამასთან, მათივე ცნობით, 2018 წელს ევროკავშირიდან მეტი ფული გადმოირიცხა საქართველოში, ვიდრე რუსეთიდან.
„2019 წლის პირველ 5 თვეში ევროკავშირიდან გადმორიცხული თანხა, რუსეთიდან გადმორიცხულზე 57%-ით მეტია, როცა 2013 წელს რუსეთიდან 2-ჯერ მეტი თანხა შემოვიდა, ვიდრე ევროკავშირიდან. 2013 წელს რუსეთიდან გზავნილების წილი მთლიანი გზავნილების 54% იყო, 2019 წლის პირველ 5 თვეში კი 25%-ია. ამავე პერიოდში, ევროკავშირის წილი 28%-დან 39%-მდე გაიზარდა,“-აღნიშნულია ორგანიზაციის მიერ გავრცელებულ ინფორმაციაში.

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *