აზიურ ფაროსანასთან საბრძოლველად წელს 50 მილიონამდე ლარი დაიხარჯება

სოფლის მეურნეობის მინისტრის მოადგილის, გიორგი ხანიშვილის თქმით, აღნიშნული ღონისძიებები სამ ეტაპად განხორციელდება.
“პირველი ეტაპი არის მასიური და საყოველთაო მონიტორინგი მთლიანად საქართველოში ფერომონების მეშვეობით. განთავსდება 100 000-ზე მეტი ფერომონი და იქნება პრაქტიკულად ყოველკვირეული მონიტორინგი, რის მეშვეობითაც გვეცოდინება, სად და როგორ ვრცელდება აზიური ფაროსანა. მეორე ძირითადი პოსტულატი არის, რომ ფერმერები თვითონ დაამუშავებენ თავიანთ ნაკვეთებს და სახელმწიფოსგან ისინი მიიღებენ დამუშავებისთვის საჭირო რეკომენდაციებს, როდის და რა ნაბიჯები უნდა გადადგან. მესამე მნიშვნელოვანი ნაწილია სახელმწიფო, რომელიც აძლიერებს ავტოპარკს – 2012 წელს გვყავდა მხოლოდ 12 ერთეული მანქანა და 2018 წელს გვეყოლება დაახლოებით 152 ერთეული საშუალება. ამ საშუალებებით ჩვენ დავამუშავებთ მილიონ ჰექტრამდე საჯარო სივრცეს და ეს არის ის ადგილები, რომლებიც არ არის ვინმეს საკუთრება, მაგრამ ამ ადგილების დამუშავება არის აუცილებელი. მიმდინარე ღონისძიებები როგორც ფერმერების, ისე სახელმწიფოს მხრიდან განხორციელდება გარემოს დაცვის ღონისძიებების უმკაცრესი დაცვით”, – განაცხადა გიორგი ხანიშვილმა.
მისივე ინფორმაციით,დაახლოებით 50 მლნ ლარით მოხდება შესაწამლ ტექნიკას, წამალს, საწვავს შეიძენენ, მომსახურე პერსონალის დაიქირავებენ და ა.შ. დაგეგმილია საინფორმაციო კამპანიაც. სოფლის მეურნეობის მინისტრის მოადგილის განმარტებით, გამოყოფილია თანხა მეცნიერებისთვის, რომ ჩატარდეს კვლევები ამა თუ იმ მიმართულებით. ხანიშვილის განცხადებით, შესაძლოა დაიწყოს მოკვლევა ბიოლოგიური მტრის შემოყვანის მიმართულებით.