შსს მინისტრმა თანამდებობა დატოვა
შინაგან საქმეთა მინისტრმა, ალექსანდრე ჭიკაიძემ, თანამდებობის დატოვების გადაწყვეტილება მიიღო. იგი, გადაწყვეტილების მიღების მიზეზს განმარტავს და ამბობს, ბოლო დროს გაჟღერებულმა ბრალდებების გამო გრძნობს მორალურ პასუხისმგებლობას და ტოვებს პოსტს. ჭიკაიძე, პრემიერ-მინისტრს გადადგომის მოთხოვნით მიმართავს:
,,მინდა მივმართო საქართველოს პრემიერ-მინისტრს გადადგომის მოთხოვნით. ჩემი ეს გადაწყვეტილება განაპირობა ბოლო დროს გაჟღერებულმა ბრალდებებმა, თითქოს მე ხელს ვაფარებ ზურა ვაზაგაშვილის მკვლელობაში მონაწილე პირებს. მიუხედავად იმისა, რომ ეს ბრალდება არ შეესაბამება სიმართლეს, მე ვგრძნობ მორალურ პასუხისმგებლობას და ვტოვებ დაკავებულ თანამდებობას. იმ შემთხვევაში, თუ მოხდებოდა ცხელ კვალზე იური ვაზაგაშვილის მკვლელობის გამოძიება, მე არ მივიღებდი ასეთ გადაწყვეტილებას. ამ ტრაგედიის დღეს მე არ ვიმყოფებოდი საქართველოში. ვინაიდან გამოძიება გრძელდება, ვთვლი, რომ უნდა ჩამოვშორდე პროცესს, რათა საზოგადოებას არ დარჩეს კითხვები ხელისუფლების მიმართ. გამოვთქვამ იმედს, რომ უახლოეს მომავალში გამოძიება დასრულდება და ყველაფერს თავისი სახელი დაერქმევა”, – ნათქვამია განცხადებაში.